首先，我自小成長小康之家，生活唔算太差
屋企有養狗仔，幾年前工作認識左現任老公，佢收入大約兩萬，我萬4，個陣知佢搞緊破產，18年生左個仔，20年年頭完左4年破產期，本身佢係公屋仔，阿媽都係冇錢有精神病，生完bb同佢阿媽鬧完交到而家都冇見過佢。
咁生完鬧交後搵屋搬出去，可能佢住慣公屋一人單位好細好迫，佢用接近一萬租金未問過我租左個劏房一家三口一齊住，我已經冇野好講，明知有小朋友會好迫，租左都冇計要硬食，仲要冇錢，我又要返工佢又要返工，當時我地係輪流將小朋友細細個湊去保姆姨姨屋企，所幸保姆姨姨都非常好。
中途有鬧交鬧過跳樓、鬧到佢拎刀插自己大髀流哂血入急症、打傷我（呢次我報警），有社工跟過叫佢去睇精神科，佢都冇去睇。
到2019年12月搬返我媽度住，一來地方大，二來唔洗比咁多錢租，基本上我媽要我老公交返水電費就算！
我本身其實都揹住成身債，但份人工同家用勉強頂到，搬返阿媽度…我老公完破產期就同我整左架車返黎，係朋友放既二手車，又係唔買都買左，我冇話事權，你叫佢賣佢都唔會賣。
但架車本身都好耐車齡，耐唔耐又要執一次，佢成日可以同我講冇錢，原來啲錢拎左去整車。
佢過分到成日都吾交水電費，我阿媽已經唔出聲，平時屋企叫佢洗小朋友啲衫都係度嘈，大家都要返工，做樣家務好正常姐，佢得閒都唔會吸下塵拖地，見到地下污糟都唔會做，講多兩句會發脾氣鬧我，我已經廢事再出聲，2020年10月有次鬧交用外賣粉面湯潑落我度，潑完就要將啲麵餸執起再扔我，個次我阿媽好嬲，話我做咩唔報警，佢又潑到一屋都係湯，當然叫佢自己執返好，佢打我都唔係第一次，但我再三容忍。
今次，佢出糧出二萬五，計埋我地要睇中醫、比我既家用、日常開支，點都唔會用哂二萬五，起碼仲會有幾千甚至一萬左右，本來都唔知佢出二萬五，係我入佢公司睇糧單先知，因為佢同我講冇錢食飯得返一舊水！
我問佢啲錢洗哂去邊？佢一開始都唔肯講但我好肯定係拎去整車，發生前幾日聽到佢接左個整車問價電話，先同我講啲錢用哂整車同比左我，仲話啲錢唔用黎整車都唔會有剩，我話個度起碼成萬，點都用到月尾呀？你而家一蚊都冇，個仔唔洗食飯咩？點解咁大個人都唔識留錢，而家已經冇錢
個晚我要返工，見佢煮比阿仔淨係食通粉同兩條菜，之前我見佢懶，係特登煲左啲番茄薯仔湯比佢用黎整烏冬同通粉比個仔食，唔洗成日食清水煮既野，因為我老公以前同佢媽住，佢媽都係清水煮麵比佢食，係冇味既麵！所以佢覺得冇問題，我媽之前都有買肉返黎，但佢係懶到肉都唔整，舊肉係雪櫃擺到發臭，我阿媽嬲到而家肉都唔買。
我覺得咁樣真係好攰，佢係冇家庭觀念，覺得洗哂啲錢，仲有我媽墊底幫手比錢
我朋友叫我離婚，話個官會要佢比贍養費，因為就算佢同我搶個仔都搶唔到，佢老母有精神病，同埋我地有報案底