同一個台灣媽媽傾開, 佢女係行呢個醫師推介既加固方法, 佢有三大原則：
一、四個月就可以開始吃副食品。二、父母本身有過敏體質，孩子更要從四個月大開始吃。三、一歲之前除了蜂蜜，什麼食物都可以添加，除非吃了會產生過敏症狀。但需注意剪碎壓爛很重要，比如說堅果花生等硬食物，三歲以下絕對不可以整顆餵食。
唔使專登整米糊, 果餐大人食咩, 細果個就食一匙羹剪碎左既, 有調味都無所謂, 目的係俾BB 盡早接足多樣既食材, 減低將來敏感風險 。
我大仔果時係行傳統6個月加固, 由糊仔粥仔開始, 之後加 fingerfood 試BLW , 肉類後期先加, 點知到大仔2歲真係試過一次因食牛肉敏感成個人腫哂要去急症室。。。
而家細仔就4個月, 我好有興趣試佢個方法, 想問下有無媽媽試過, 有無心得分享呢?
裡面講嘅嘢大約睇咗，有幾點我會有啲懷疑
第一點：佢篇嘢講左好多理論，但佢啲理論係有冇參考資料？
第二點：佢話一次過食好多種類嘅食物但每樣食少少，到真係敏感都只係會好輕微所以唔使擔心，但事實上食物敏感嘅人食少少就有機會好嚴重？
第三點：佢話可以係小朋友嘅食物加糖？
好想有人一齊討論下，所以專登回覆返而個帖
唔認同小朋友得4個月大就開始加調味，一黎食慣左濃味嘢番唔到轉頭，二黎調味唔健康
感覺係大人懶得分開煮多餐bb既先會咁做
有調味都無所謂？
唔太認同。
落多咗鹽，已經可以傷害bb嘅內臟功能。
bb又未識表達口渴，太多鹽有機會脫水。
我大仔都十幾歲。
當時因為好嚴重既厭奶
我係4個月左右比糊仔佢食。粥水爛米。食多左開始就有比魚，肉，菜瓜，打到爛晒
菜心一支拎住黎咬
我唔識咩理論，我當時只想佢食到野。。
細果個都11歲 雖然無咩厭奶，但 都係咁上下時間食糊仔
兩個小朋友，1歲戒奶粉
Touch.wood 健康快樂，無食物敏感
致於調味，我開初有好堅持唔比調味，而我媽都覺得多多少少都要加d…大人都唔想食無味野啦。
我亦唔太抗拒無謂同呀媽嘈。咁開始轉食粥仔時就有加調味
我覺得對我2個小朋友影響不大。
其實新鮮食材就咁蒸煮都已經原汁原味，大人鐘意食有調味嘅嘢係因為習慣左有調味，所以唔會食得出食材淡淡嘅鮮味，而小朋友係白紙一張，我會選擇比佢體驗最天然嘅味道。
至於敏感問題，1歲前大人常用菜、肉、水果都應該已經試哂啦？
你仔仔係2歲先第一次食牛肉？定係當日煮牛肉時加左某啲調味嘢令佢敏感？
我都認為呢種方法好危險。
一次過食好多種食物冇問題，問題係bb第一次食嗰啲食物定以前已經試過安全？
如果有3樣新食物同時食完之後佢有嚴重敏感，咁你咪要再冒險逐樣試多次先知佢咩敏感？
定係呢3樣食物就一世都唔食得？
同意。
一黎bb食量少&飲水唔會好多，二黎佢哋嘅肝腎功能未發展成熟，我哋覺得好少嘅調味份量，對佢哋黎講已經係over哂。
呢啲咪又係八十年代嗰種方式，四個月大餵固體，大人食乜跟住食，但而家啲三四十歲嘅人好健康咩
佢哋健唔健康就未必直接關細個食乜事嘅～不過睇完篇文有一大段文字好明確咁表達媽媽係為咗方便所以咁樣做⋯⋯
咁你明啦。
有好多菜本身好甜，以前加南瓜、紅菜頭、粟米bb已經好鐘意食。
我生第二第三個時，唔會主動喺佢啲食物加調味料，但係大人嘅食物，如果唔係太濃味太辣，都會俾啲佢試下，食薯片同糖都會比啲佢試下
食返佢自己啲無味野，佢又好ok嘅
我呢邊興餵baby food, 我都成日買，睇真啲，係有鹽架，但係人地個比例係營養均衡先推得出黎賣，要我自己加鹽我就唔敢喇
我諗唔好過分到好似啲老人家咁，喺粥仔度加豉油囉
好開心終於有媽媽同我一齊傾加固啦！
我細仔而家4個半月, 因為佢厭奶加唔肯食奶樽, 我就已經開始左加固，但我無跟哂呢個台灣醫生既做法, 每晚晚餐同我地一齊係飯枱, 食既係飯煲上邊蒸南瓜, 番薯果啲俾細仔試食, 或者煲完湯既紅蘿蔔, 菠菜, 腰果栗子整到變蓉, 俾一, 兩啖佢食, 但好多時佢都追住想食多啲!
目前都算食得唔錯, 會慢慢加份量同種類, 下一樣會想加唔同蛋白質俾佢, 米飯反而想遲啲先加
呢個醫生有另一篇寫:
如果以成年人的當做指標，三個月嬰兒的腎功能就已經達到成年人的一半以上，六個月則接近八成，一歲之後基本上就差不多成熟了。
但佢又無放 references… 
不過我認同唔俾餅乾零食果啲，因為呢啲一定更高鹽
同你一樣
我果陣摸索點轉粥仔都有睇過黃瑽寧,我覺得佢每樣俾少少, 一餐食多幾款係OK。但係因為BB未坐得好好, 條頸又未硬, 就冇係4個月時俾糊仔佢食。
不過我最後係6個月之前, 5個月就開始試。因為知道BB一開始其實都唔係食GE, 反而似係同佢洗面多, 食到入口GE野好少, 所以預多D時間俾佢慢慢慣。我自己目標係6-7個月可以食到。結果而言係成功GE, 但係起碼用左3個星期時間佢先慣。試完淨糊仔, 就開始加生果蓉, 每幾日就加一樣野, 試多幾款食物就可以一碗粥仔入面有3-5樣食物。
果陣時睇佢完全冇理佢講調味果度, 因為健康院資料都講得好清楚係唔需要, 咁自己控制到就完全唔落啦。不過好現實咁講, 養B又真係未必可以跟教科書咁跟到足, 現實上要返工, 唔夠時間等都可能要犧牲下。我都幾肯定父母都養得我幾乸西, 不過我都而家都幾健康。
4個月定5 個月開始食其實都唔會爭好遠, 就算遲左開始, BB都仲有1千個月飯食。而家食少D鹽, 將來又可能食返多D, 做父母都係盡做而已。
就算係咁，都會盡量唔調味，開個頭好容易，之後要佢食返淡味就難。
而且敏感主要係食物，唔係調味料，咁俾原味食物佢係無問題。
另外，佢係敏感嘅就算4個月、半歲開始，都係會敏感，愈細個敏感反應愈大。例如我小朋友有敏感，醫生都係叫兩三歲後先再試，到時反應無咁大。如果四個月、半歲就俾佢試如果真係敏感可以好嚴重。
依點真係睇到O咀，如果家族有敏感史，我會傾向預計小朋友都有機會敏感，咁我會情願安全啲，遵守住每次只加一種新嘢原則，少少咁加上去，因為你係唔會知小朋友會有咩敏感反應（因為識有啲小朋友係嚴重敏感嘅，一食錯少少就會嚴重到入院）。
講真，慢慢試，其實兩歲前都可以食到好多主流嘅大路嘢。
其實係外國呢幾年有太多人出現生花敏感, 佢地而家有好多研究都講話係要盡早畀佢哋接觸花生反而會避免咗敏感嘅發生 
(舊式話要大個啲先俾花生小朋友食, 係因為怕有窒息風險, 但見到呢個年代先有咁多人敏感, 就發現個原因係太遲俾佢地接觸)
我一Google 就出美國政府網頁既資訊 -
“The guidelines suggest that parents should introduce most babies to peanut-containing foods around the time they begin eating other solid foods, typically 4 to 6 months of age.”
但有嚴重濕疹或蛋敏感既B就建議做左驗血先食, 中度濕疹B 都可以6個月時自行係屋企試食
美國2010年就已經開始有呢個新方案, 2015年有研究指出呢個新方法, 可以避免咗80%嘅生花生敏感既出現!
香港好似到而家都無咩人知咁既