想問各位在職媽媽會不會在長公眾假期安排仔女做功課，等你可以教？
我有一個仔，初小，讀國際學校，功課唔多但係有質素，雖然自己可完成，但有媽咪解釋一下就會做得更好。
我自己內心係希望放長假（尤其公眾假期）會係休息時間，完全唔駛做功課，大家一齊享受假期。但係今日返工睇返佢年三十晚做嘅功課，又真係做得麻麻…
俾你係我，你會點揀？
（任何意見分享都可，謝謝）
1個讚
非雙職媽媽
就呢件事黎講，只要你係年三十晚同小朋友搞掟曬d功課，就可以解決係假期做功課呢個問題？
唔可以，假期功課係預咗學校假期日頭做，唔會平日夜晚咁少時間搞得掂。
重點係全職媽媽可以喺學校假期指導仔女做功課，我唔得，年三十晚我要返工㗎，只有個仔放假。
搞功課點都係你放工返黎先搞，無衝突喎
不過既然做唔曬功課，點都係假期都要搞
你無學校假咁多日搞，唯有係學校假期夜晚你放工返黎搞
讀國際學校唔使追分數，完全放手比個仔啦，做得唔好等老師比feedback，而且我相信小一功課量唔多，每日最多咪十五至二十分鐘，絕對唔會影響休息時間。
冇衝突喎。
做得真係唔好嘅話，老師會講，佢講一句好過你講十幾分鐘，等小朋友自主學習，主導自己學術路。我知好多雙職家庭本地學校，夜晚 9 點先返到屋企，啲仔女功課佢地唔會睇，只會叫佢哋認真做，做得唔認真咪等比老師鬧兩句。最多唔識做咪影低儲埋一次過問，或者直接請個補習姐姐跟。
全職媽媽都唔一定會指導做功課，有啲媽媽都會放手。讀得國際學校，你更加要習慣放手。你唔放手畀佢自己去摸，佢好難學會建立自律、動力。
3個讚
我就係九點先返到屋企嘅人，因為放工會喺老人家屋企食埋晚飯先走
不過有時見到老師將其他同學嘅功課貼堂，見人哋寫得整齊內容又好，睇到我仔嗰份，真係有啲慚愧。我只係諗，假期有時間，係咪應該自己教返呢？等佢唔好同其他同學差咁遠？
如果從我仔角度諗，假期逼我做功課，一定嬲死媽咪
人地有得貼堂，可能係私補，未必係媽咪幫手
唔想影響親子關係，最好係外判
唔少國際學校小朋友都有私補架…中、英(係吖，英文都照補，谷 grammar 嗰啲囉，有啲媽媽抵唔住，忍受唔到學校老師唔改佢哋 grammar) 數、科學，唔顯眼姐，可能貼堂嗰啲係咁樣呢～
你細個都未必次次有功課作文貼堂，咪照樣開開心心出黎搵工賺錢，全家幸福。如果仔仔係恨貼堂嘅話，佢會出聲。佢冇乜所謂，只想開開心心過關嘅話，咁你就冇需緊張。
我是雙職媽媽，孩子也是初小，本地學校。我有對小朋友講清楚我的要求，每日放學後自己做好功課，包括老師話的預習和串字，做唔到就要去補習班，因為我好夜才回到家，無時間到時先做功課。假期盡快完成所在功課，因為我要和他一起出去玩。
我覺得要比他知道你的要求或者他自己有什麼要求，再大家講清楚要點做。
盡快放手比佢自己做
1個讚
重有，其實我唔想幫佢對功課，做齊就算，但阿仔想我幫佢對，因為有4張貼紙老師會有禮物。
我ftm小朋友讀IS,學校功課唔會今日比聽日交,通常都set咗deadline,我就冇additional比功課,只係要求認真做好學校嘅就可以了
讀得IS就唔想填鴨,唔會將自己以前嗰套套落小朋友度
P.S.係上到中學先有補習
其實睇你自己過唔過到自己果關。
我不嬲唔睇功課，係會幫手聽默，同考試前坐係屋企陪佢。(只限小學時)
利申：非在職媽媽。
我同小朋友係ftm配津校小一，不過我覺得讀咩學校咩we or ftm都好，如果可以從細放手越好，趁佢地宜家仲細，衰咗都唔太大影響。
學習嘅嘢，如果你仲緊張過佢，佢都無乜所謂咁，媽媽會好辛苦，依樣要由小慢慢培養，急唔嚟。如果只係做得麻麻，麻麻在邊方面？如果只係啲小問題、寫得唔夠好，由佢錯下啦，唔駛下下要做到完美100分，除非係啲大問題，咁就要立下糾正。當然你都可以同佢傾下，問下佢覺得自己做成點，講下你期望。如果佢暫時滿足於現狀，咪由佢先囉，唔好急於一時令佢討厭咗學習。
3個讚
多謝大家嘅回覆。正因為國際學校嘅功課貴精不貴多，我先諗係咪應該認真做，好過由得佢亂咁嚟。本身學校係冇乜功課嘅，但因為疫情上網課，學校唔夠課時，部份嘅堂課就變成左功課攞返屋企做。呢啲堂課係需要小朋友自己理解題目，老師有時會比一兩條YouTube佢哋睇，但我個仔未必想睇，無大人喺隔離亦唔會專心睇。結果佢啲功課就亂咁做，有時唔係佢唔俾心機做，而係一開始就理解錯題目，搞到要由頭做過。講真唔係太離題嘅我都照交，老師亦唔會介意，多數都會讚佢哋完成功課好好。
咁似乎大家嘅意見都係覺得唔應該犧牲親子時間去打理啲功課，我都會遵從大家建議，希望阿仔越嚟越大個，理解題目嘅能力會越好，啲功課唔會太亂來啦！
2個讚
睇下邊間IS, 又睇下你想阿仔將來點。我兩個小朋友唔同IS，
一間係隨心教，你唔識會由得你，但所有同學都好勁自己私補。
另一間緊張D，會留意下小朋友進度（不過都係無本地咁緊張），但同學都無咁勁。
我既目標係去英國，所以普通話就隨便，但英文我希望跟到英國課程，所以假期期間會串字同睇書。
網上學習，就唔適合啦，你估個個科技奇材咩，一定要家長幫下，等正常返學先慢慢培訓返自理，冇必要日日被人罵同投訴
1個讚
講到底係要佢哋養成自學嘅興趣
或者咁講,你平時多D問佢學緊乜嘢,到佢同你分享時你就等佢表達咗佢嘅見解先,先認同或者肯定佢嘅做法,之後再補充你認為同樣重要嘅
我都係咁,我會幫助我個女,但都希望佢自己試下做左功課先,唔識既我先教佢~佢學校好多網上學習,唔一定要做曬,但佢都會主動要求做曬佢,因為有分數排名,佢想排頭 
我覺得你教佢理解左題目,之後先放手俾仔仔自己做會好D~ 我女都係小一,佢有D題目唔明問咩,真係要大人教下先開始做到~