(超長文，純分享)
雖然無食全餐，不過都差唔多齊晒
我係上年12月生嘅。
38w6d朝早開始痛，7-8分鐘痛1次，同時又有見紅，頭一胎唔識分假陣痛真陣痛，見中咗兩樣就call車叫老公送我入院。
好彩有叫老公送我入院，因為無諗過我的生產之路係咁漫長嘅
11:00(+0)入院，俾人送入隔離房等武肺檢測結果出嚟，3餐同屎尿都要床上解決，不過依間房的好處係可以玩手機，時間無咁難過。
隔離床位太太每5分鐘就叫30秒，叫到好似收埋個男人喺床度做緊嘢咁，勁擾敵！叫到姑娘叫佢留返啲力仲有排都未生。其實我當時已經5分鐘痛1次，頻率同隔離床太太差唔多，天真嬌的我仲諗緊點解可以叫成咁，事後回想返原來我當時只係小兒科假陣痛🥲
19:00(+8hrs)檢測結果出咗，無事，醫生見我5分鐘痛1次就轉我入待產房，但入到待產房我的陣痛又慢慢變返9-10分鐘1次，22:00又將我轉返出去產前房。
我打定輸數今次係報假案，聽朝就會俾人掟出院。心入面默默咁希望阿B快啲出嚟啦，再入院又要做多次test，好煩架嘛！襯廣華產科未出事，拿拿臨生完就走。
咁可能阿B聽到我的心聲，凌晨兩點就穿咗水，今次一定要生完先出院啦。
(其間我的陣痛係一直都無停過，雖然係假嘅)
39w 02:00(+15hrs)又轉返入待產房，依個時候我嘅陣痛又變返5分鐘1次，穿水之後仲愈來愈痛，不過仲頂到，姑娘見我的面色尚算正常就叫我襯依家訓多啲，有排都未生得，可惜我當時訓唔著。
08:00(+21hrs) 醫生巡房， check完宮頸未開過，我就問下可唔可以催生，醫生話我應該可以自然生到。
期間有兩個催生的大肚婆8:00入嚟，落藥，13:00就生得推入產房，真係好羨慕。
17:00(+30hrs) 3分鐘痛1次，本身好期待醫生巡房check吓開咗幾多度，但我去廁所miss左。
22:00(+35hrs) 每次陣痛都痛到成個人震哂，明明一直都有規律痛，但都係下腹痛，即係假陣痛。
好攰好想訓，亦都訓得著，但每3分鐘就痛醒一次，每次醒返見到個鐘淨係過咗3分鐘真係渡日如年，無限loop。
待產房係無得用電話，連分散注意力都唔可以。
姑娘仲同我講，如果我穿水超過24小時都未生得，BB一出世就要入兒科觀察有冇感染，未必可以一齊出院，我陣痛住落床出走廊崩潰咁打俾老公，點解痛咁耐都無真陣痛，到底幾時先生得
39w1d 02:00(39hrs) 穿水過咗24小時，已經確定BB要落兒科。
待產房每3定4個鐘會check1次BB心跳，依個時候，部機開始咇，咇，咇聲，姑娘即刻衝過嚟，原來係阿B心跳過快，去到180幾，姑娘即刻call醫生，醫生check哂所有野都搵唔到原因，我問會唔會有危險，需唔需要開刀，醫生話心跳慢先危險，暫時都無咁嘅需要。
我又問可唔可以打止痛針，醫生又話我未進入產程，唔可以咁早打。
姑娘幫我打豆，吊鹽水+抗生素，心跳機每3分鐘咇一次，每一次姑娘都要過嚟睇，到最後佢直接企我隔離mon住我。
我本人就一邊擔心，一邊氣喘+心跳加速+痛到震，一直到05:00 BB的心跳先正常返。
08:00 (+45hrs) 又到巡房時間，醫生check完話我宮頸已經成熟軟化，開咗1度咁多。
我真係崩潰咁求醫生幫我打止痛針/無痛針同催生，但當日星期六無麻醉師當值，無無痛打。而且都仲覺得我可以自己生到，唔肯催生
醫生見我已經穿咗水好耐，終於肯俾我打止痛針。9點打完止痛終於可以訓到10分鐘先痛醒1次。
10:00 (+47hrs) 醫生又嚟咗，見到部機的陣痛慢咗，話依個密度係生唔出嘅，今次終於肯幫我催生，而且話我應該係高位穿水，要再人手穿多次水。
催生+穿水之後就係地獄吼問式的陣痛，好快就由10分鐘變返3分鐘再到2分鐘然後1分鐘1次，結果我只係享受到支止痛針1個鐘
13:00 (+50hrs) 終於痛到有痾屎feel，姑娘猛咁話我未生得架，要忍呀！我極度懷疑啲姑娘係呃我嘅，故意拖長時間，因為打完支止痛針要過4個鐘先可以生，唔係藥力會影響到BB，所以拖得就拖。
我真係想痾到不得了，完全忍唔住。
不過佢哋已經幫我插尿喉放定尿。
13:35 (+50hrs+) 忍忍忍忍，姑娘企床尾(係4-5個姑娘圍望住我痛到打滾嘅樣，應該所有就生得的大肚婆都係咁被圍觀嘅
)，望到我插住尿喉的下體已經見到BB個頭，終於肯推我入產房。
姑娘洗手換衫，仲有人問我打唔打俾老公話生得，我已經想痾到極致，唔打！！！
一切就位，我push咗3吓就痾咗阿B出嚟，都唔知係剪唔切定無諗過幫我剪，總之就裂左。
入產房後都無15分鐘就完事。
之後就聯針，15分鐘的同BB親密接觸完，BB就推落去兒科lu
(好彩BB一切正常，健健康康)
完。
原來唔係得我咁諗過，嗰時仲諗個窗點解開唔到