背景：bb兩個幾月，我有14週產假，仲有一個月可以陪bb，老公返office，另外讀緊書（除左上堂仲要考試），佢覺得對一個家庭最重要嘅唔係陪伴，係努力工作進修搵錢，提供一個更好嘅經濟環境先係最重要，佢係錫同鐘意bb，但只想同佢玩，唔想湊
老公喺屋企時間(平時收工返黎/宜家wfh/星期六日放假)除左瞓覺食飯去廁所，9成半時間都係做公司野/上online lesson/溫書，平日日頭99會幫手一齊湊，另外工人姐姐做家務煮飯，老公覺得佢永遠係last priority 湊b，有咩事應該我+99+工人姐姐做，其實夜晚好多時姐姐都同我車輪轉輪流湊，真係搞唔掂先諗住搵爸爸過下手
bb出世前，我有問過老公PL同AL仲有幾多，佢話半個月，但到bb出世後我根本無乜見過佢放（不過因為bb成日出入醫院，我都無時間理）
bb未滿月時出入醫院幾次，我坐緊月無辦法出街，老公仍然繼續返工唔放PL/AL，連我要送人奶去醫院都只可以叫99幫手，bb明明下午出得院，都要等老公收工先接到佢返黎
未滿月前我唔掂得生水+坐矮櫈，無得同bb沖涼，陪月一放假bb連涼都無得沖，因為爸爸根本無學過點沖，係到今日都未試過幫bb沖，陪月都話好少咁少見到爸爸，同埋呢個爸爸學湊b都學得好少
有次放工返黎佢話好攰唔想上online lesson，跟住我好開心咁話我地一齊陪bb，佢即刻話咁我都係上堂算
餵夜奶問題先係令我覺得佢係終極free rider
滿月前bb未識埋身，我要泵出黎樽餵，有次老公餵到漏晒，我即刻話佢，一黎人奶真係滴滴金，二黎bb飲得太快驚濁親，佢就大發脾氣話佢唔識餵，叫我咁緊張啲人奶就自己餵，佢唔會餵，之後轉頭大覺瞓，留返我一個一路餵bb一路喊到無手抹眼淚
之後bb終於識埋身食奶，其實好多時佢幫手換片先，我去定廁所拎定月亮枕，佢換完片比bb我就可以瞓，餵奶掃風暗瞓覺都係我直落做晒，但佢會投訴咁樣醒一醒之後瞓唔返，咁如果bb唔係喊得太勁，有時我都自己去完廁所再幫佢換片，直頭無叫佢起身（bb喊到劏豬咁佢都唔會醒，要我叫先醒）
近期我地傾好左last meal唔餵人奶餵奶粉，等bb瞓得好啲，希望戒到夜奶，到夠鐘餵時我要泵奶，佢餵時我提佢餵完掃完風要等多15分鐘先好放落床，如果唔係好易嘔奶，佢即刻發脾氣，話佢好攰，咁搞法有排都無得瞓，「唔制丫」，但其實講緊within 45分鐘之內就搞得掂，佢完全無諗過如果我餵完再泵奶，起碼搞個半鐘
沈晚bb 12點半飲完奶，最後一點先肯瞓，但佢飲多左，我驚佢嘔奶，坐喺度睇住佢，睇睇下瞓著左瞓到腰酸背痛，到4點半我起身泵奶，泵完啱啱恰著眼bb就醒，我叫佢幫手樽餵，我真係好攰，點知佢又發我脾氣，話佢無覺好瞓（但一點到五點九佢係瞓到扯晒鼻鼾），叫我自己餵返，我話我真係好攰，佢話佢都要做公司野同溫書，唔似得我日頭無野做，呢句真係辣㷫我，佢費事我再鬧佢就話佢餵，但叫我掃風，頂，咁有咩分別，我係想早啲瞓嘛，跟住我乜都無理瞓低（其實邊瞓得著），佢一個餵奶掃風暗瞓覺，然後今朝當乜事都無
我有同佢傾過，其實每個人塊餅都係得咁多，宜家要分多份比bb，當然要喺原本嘅部份減少，我自己就係用左做手工上網煲劇呢塊餅黎換，既然你覺得做野同溫書唔減得，咁只可以減瞓覺囉
其實我最嬲係佢成日講到我放產假喺屋企好得閒咁，餵奶泵奶有幾辛苦佢唔會明，仲覺得99上左黎我有得補眠好幸福，佢半夜起一起身換片/非常間中好似沈晚咁要餵奶係辛苦到嘔，全世界得佢一個好辛苦好攰
(sorry，愈寫愈長)
7個讚
辛苦jm，老公係咪就快考試要加緊準備所以忙左d呀？
睇到呢句有D火滾…BB佢都有份, 但就表現得咁唔願意…真心灰…
4個讚
佢似乎逃避緊，唔肯幫bb沖涼，係咪怕整親bb？
餵奶都係，係咪擔心bb嘔奶唔知點處理？
其實你既怨言，基本上好多家庭都經歷過。到bb越黎越大，爸爸參與率會提高。
唔知點解，好多男性只識得同會有語言既人相處。
明白你既感受，因為我老公都係咁。
你自己要保重身體。你既付出bb係會感受到(個人經驗）
佢唔明白點解要「參與」呀
喺佢角度睇，bb有你有奶奶有姐姐，點解要佢落手落腳做？佢負責搵錢咪得囉
所以，俾多啲參與感佢
仲有，要讚佢，瘋狂地讚佢
講多啲bb同爸爸的事（無都照吹啦），例如「bb見到爸爸笑得特別可愛」，「bb鍾意爸爸抱」「bb的鼻好似爸爸」，「bb第日大個要好似爸爸咁叻呀」
同埋有時又同佢撒下嬌，千祈唔好硬碰硬，一定要智取
10個讚
Same，冇耐性餵，餵到喊哂又漏哂，仲係咁咳添～所以我係比奶粉老公餵嘅，人奶咪自己餵番囉。
呢個真呀，咁搞法2個都訓得差，咁我寧願自己訓得差，從來冇試過半夜叫醒老公幫手，如果連我都搞唔掂邊可能佢會幫到手，bb喊到癲佢都仲可以劏豬咁，所以半夜我準備緊奶時都由得bb喊～
係呀，我都唔明有咩分別，有一排bb厭奶，有一餐叫老公幫手餵，佢話只係餵冇咁扭計嘅「前半part」哈哈？
放心啦，大家嘅老公都係咁上下，會捱過的，每次唔開心都上黎同jm們傾下啦，會睇開好多⋯⋯我已經唔會再要求分配工作，係湊b上，我當自己係單親媽媽～ 
佢得閒就當去動物園睇動物咁睇下個b啦～
記得準時比家用就ok。
多謝大家，睇完大家回覆真係覺得I am not alone
1個讚
佢係辛苦既，又返工又讀書，不過你講得好arm，餅就人人一個，唔肯減小工作+讀書時間，就減休息時間啦。好明顯佢以爲有姐姐有亞媽有老婆自己就印印腳
樓主老公其實係有責任感嘅人，只係大家對責任嘅價值觀唔同，老公肯進修係好有上進心，佢覺得要比更多資源小朋友而努力係好事，真係好過好多爸爸架啦！又番工又讀書真係好辛苦架！
而人永遠都會覺得自己辛苦啲，人哋輕鬆啲，所以就算我覺得老公份工得閒，但其實有苦佢自己知。
要改變一個人係好難，改變自己諗法就最易。我餵奶換片氹緊bb訓洗樽洗泵煮飯洗碗嗰陣，老公打機⋯⋯但我會覺得，佢至少肯留係屋企吖～咁人哋番工一至五咁辛苦，比著我都想休息下啦，如果同佢之間只可以有一個人有優質嘅休息，咁我會揀比佢休息。唔係我偉大，而係叫佢幫手我仲攰。
2個讚
其實如果計劃生小朋友 要抽時間出黎照顧 點解仲會去讀書
2個讚
湊初生做媽媽一定係辛苦。半夜個時都係我一個人餵奶泵奶，我都寧願叫老公瞓多啲，自己一個人做晒。當然每日重複加上瞓得少就會希望另一伴能夠幫下手。
我個時湊B遇啱奧運，我記得半夜係邊睇奧運邊埋身同泵奶，所以個時唔覺悶，仲好享受無人煩住晒。
再過多兩三個月BB就會轉身，再遲啲會坐會爬會行，會見到爸爸參與度都會多左。
到時做媽媽又會勞氣第二樣野架啦。
1個讚
聽落去又唔完全係free rider 佢都肯幫手餵夜奶換片… 不過佢仲未意識到newborn有幾多嘢做啫！
襯佢好心情時分享多啲你同個b「充實嘅一日」啦！我成日都同我老公emphasize我返咗成日工好散晒（我都仲放緊maternity）
同埋可唔可以同佢傾夜晚分上下半場呢？兩個人都瞓唔好不如分工啦
sambb
17
你自己捱左佢， 最快你就舒服。 記得錄低佢話陪玩。 第時佢就知味道， 至少有五，七，十年要跑公園， 果啲先堅攰。
姊妹， 大部份老公都係咁， you are not alone.
我老公都係咁㗎，嗰陣佢又係番工+讀書，我反而唔想半夜嘈到佢咪佢番工冇精神，朝早放手俾姐姐同婆婆揍，夜更我嚟(我仲一路泵奶一路煲下劇)。個仔3歲嘞老公都冇同佢沖過涼換過片，但嗰陣姐姐放假都有幫手洗衫洗下奶瓶，而家佢肯陪下仔玩，合格就算嘞。
揍初生係辛苦㗎，但時間好快過，好好珍惜bb仲係一pat嘢嘅時候啦，加油
我嗰時小朋友大少少嘅時候頂唔順,一怒之下出門口幾個鐘,俾佢困獸鬥.之後佢係咁打電話催我返去.睇佢仲咁唔敢唔理,或者話我好得閒. 
我老公都係咁，掛住讀書返工，一放工就入房開電腦，食飯先出黎，食完又入房，唔會同bb玩，每日我同工人搞掂個b，9成係我凑，佢覺得佢既責任係搵錢
我呢世都記得佢講既野
- 你日日同bb玩，不知幾寫意
- 咁你出去搵錢囉
- 人地ftm都無咁多怨言
Ok Fine我已經當自己偽單親，有離婚既準備
利伸：bb已經識俾反應，識爬
3個讚