BB埋身時間次次唔同… 有時食10分鐘就夠, 跟著唔夠2個鐘又要食。 有時食奶…掃風…食奶…掃風… 搞成3個鐘佢先肯瞓。
咁搞法我身體點知要做幾多奶先夠? 係咪應該泵出黎好d? 佢食2啖就唔食, 掃風時間仲多過埋身, 好崩潰…
不過我好想全埋身, 怕佢食慣樽會唔肯埋身。
有冇跟時間喂？例如3個鐘一次咁？
10分鐘你感唔感覺到佢係勁食定係hea食？
如果Hea食，可能佢未夠餓，上一餐同呢餐時間近，當「小食」咁，咁搞到下一餐咪要提早囉！
我覺得最好跟時間表，咁大家都唔會亂！
埋身既話應該小啲風，奶樽飲就要掃耐啲！
Bb幾大
初生係咁架
正常
佢大大下就會build up 到routine
就無咁辛苦
媽媽加油
BB半個月大。如果佢1個鐘就叫肚餓都無得迫佢3個鐘1餐。佢食10分鐘就瞓著唔肯食我都無辦法。我都想知點跟時間表餵
唔知點解我個B埋身仲多風過食奶樽…
佢次次埋身都食到hehe聲吸晒d風。有時食5分鐘就要掃一掃風先可以繼續食, 否則d風頂住佢食唔落。
食得幾好喎，我果個食十幾分鐘，每個鐘都肚餓
啱啱一開始係咁，bb一開始未掌握到個啜法，又易攰（啜奶好攰㗎）
過咗一排，佢啜順咗，大約15分鐘2邊，會好好多～
再唔係，去健康院覆診可以請教吓啲姑娘～
加油呀媽咪！熬過咗就得㗎喇！
Feed on demand
佢自己大啲會自然有定時
半個月set時間太早喇
我明 我真係明 好崩潰
你捱到半個月已經好叻
我出院就放棄咗，因為兩邊乳頭損晒，轉咗泵奶
到bb臨滿月前先再慢慢埋番身，好彩又得
不過都係有補奶粉
你係咪肯定bb啜得正確？
不妨考慮吓番健康院/公立婦產科搵母乳姑娘睇吓
我試過塞奶，都係搵佢幫手 俾到專業意見
BB在醫院時都啜到我損晒, 但出院後佢開始識啜, 無再損了。我覺得揼奶仲痛過埋身, 不過揼奶佢一餐可以食多d不用餵咁密… 我都有保奶粉呀。佢2星期大, 試過揼出黎佢要食140ml, 佢埋身食10分鐘應該係唔夠飽, 但佢成日食食下累到瞓著左…
你bb仲細 我相信呢度所有餵人奶嘅媽咪都經歷過呢啲咁崩潰嘅時刻
放心喇 佢大個啲慢慢就會穩定番幾個鐘食一次
而家佢肚餓你就對埋佢喇
其實埋身愈多你就會愈多奶 可以全埋就全埋喇 因為洗泵都好煩
（如果希工人姐姐另計）
不過都唔洗太大壓力既～加油！
咁可能係佢啜得唔好，搞到食得唔好，有無搵過母乳姑娘果啲睇睇bb食得好唔好？初生埋身真係要密密隊個胸比佢。加油呀
第一胎時個女埋身5分鐘後一定瞓著，一放低又喊再抱起埋身，無限loop 決定泵出嚟餵，變咗feed on schedule，定時定量。
第二胎埋身，初生已經係4個鐘一餐，反而泵奶時多時少都捉唔到佢飲幾多。
其實我想講個個bb 都唔同，最緊要你同Bb 搵到個模式係大家都舒服嘅，媽咪湊得輕鬆d 對bb 都好好。
1個讚
埋身食到好多風就係啜得唔好，佢要含哂成個乳頭，下唇包哂乳雲先得，如果啜啜下鬆左要stop佢，甩番乳頭出黎重新再放岩位先比佢啜。
半個月大好細啫，埋身真係攰過啜奶樽，BB用多好多力架，同埋半個月，大概係我產後抑鬱嘅狀態，最崩潰嘅時候，覺得好多嘢都唔順，又未熟習BB。
你個B肯啜咪好囉，我個B唔啜搞到上奶慢要補奶粉，黎個惡性循環
繼續上奶慢，衣加兩個幾月變左全泵，佢已經完全唔肯啜我，聞到我個胸已經大喊⋯⋯
我第一個禮拜都係咁，好似冇時間休息咁，但我開刀傷口又痛，所以最後都要不停補奶水同開始用奶泵。
而家阿B兩個幾月，我都係每餐泵好耐冇埋身啦，因為泵奶佢每次都食到起碼150，其他人又可以餵，我又可以休息多啲，方便好多
同你情況一樣！B兩個幾月，每餐150，冇埋身好耐，但每次泵一個鐘或以上先夠佢食，泵得耐乳頭其實會痛⋯⋯
衣加一日6餐，有5餐可以人奶，但我好想縮短泵奶時間，有諗過搵催乳嗰啲幫手，但又冇識人用過⋯⋯而且好怕泵泵下冇佢刺激就減奶量
要泵一個鐘咁耐係因為個泵出得慢定係奶水唔夠？如果係個泵有冇人可以借其他牌子泵俾你試吓？如果係奶量問題，我之前陪月係到時教我要用通草煲水同飲好多湯，Keep住身體有水份真係爭好遠㗎，出奶出快好多
我出奶一直都係慢，見到有啲媽媽話泵到奶柱我真係驚訝！我就算谷到爆都係泵到滴出黎咋⋯⋯
我問個陪月佢話人人體質唔同 
我用緊spectra 9+，力度方面佢係扯到乳頭架，咁應該夠力？定真係要試其他機上身先知啊？
有無試下按多d胸，等個乳腺快d通？陪月教我一路泵一面按下胸，特別係硬硬地ge地方，再唔係就飲下魚湯或者搵催乳師？
你有無請陪月？有就問下佢點搞
有output 身體就會造奶，繼續餵佢繼續做，唔洗擔心
身體會慢慢掌握到做幾多奶俾bb。
有時bb 埋身唔一定肚餓，可能係要安全感、啜啜得到安全感，有時可能係口乾，有時可能係嚇親。
埋身啜啜俾到bb 既唔單止係食物（母乳），仲有bb 心理上既需要，媽媽加油