始終要擺好多錢去裝修 想問大家有無咩係你地裝修時唔知 住落先發現當初唔應該咁整或者有邊樣係你地整完用得好開心
唔該晒大家
唔好信晒個師傅，通常扮晒老實，同你講：「呢樣唔洗晒錢整，果樣建議你整，唔需要整就唔建議你做啦⋯⋯」
後來先發現佢建議的多餘又overpriced,佢所謂「唔建議」的就佢冇班底整或冇水位！！我用過幾個師傅都係咁！熟人介紹一樣！
3個讚
其實我全無經驗 唔識分邊D係重要 邊D係你講既情況 驚最後整到唔湯唔水
BTW 多謝你係BD第一篇回覆比左我 
問管理公司裝修要求。有D大廈公契可能列明唔比業主改喉、分體機要安裝指定位置之類，裝修公司無理會，最後受害又係業主自己。
2個讚
裝修前儘量諗定邊個位要用插蘇，插蘇位儘量做多D，唔係既話到時要加拖板就唔夠美觀整潔。不過通常插蘇位都係超出預算最多的地方。
1個讚
講得啱呀，或者係太復雜唔想做。
冷氣要封好，最好冬天裝修。
一要郁電線就好貴 所以我仲諗緊郁唔郁
聽完你哋咁講 希望我可以搵到個好既師傅啦
你係全爆？
我早兩年全爆，做唒入牆傢俬，有好有唔好，睇你budget同埋鐘唔鐘意隔幾年就會郁吓傢俬位嘅人，如果好似我咁入哂牆，基本上只係得張梳化同餐枱搬得郁，之後想改就難好多。
同意樓上jm講，電制要預多啲，我主廁就係冇預多電制位，好多小電器要左換又換，麻煩。
早兩年好多人用浴室寶代替抽氣扇，我都有整，發覺佢抽氣能力麻麻，又大聲，淨係冬天凍嗰兩日開暖風會舒服啲。如果你整廁所，我會建議你整返抽氣扇，反而加熱毛巾架，可以暖乾大毛巾，乾淨又無咁易有菌之外，仲會暖到個洗手間。我而家想整，但係又係唔夠電制。。
另外有一個設計我好鐘意嘅，就係之前叫師傳晌客厠預留左一個櫃位，我放哂啲地拖水桶遮呀呢啲濕碎嘢入去，間屋睇落企理好多。
7個讚
多謝你意見 應該都唔會整入牆 驚有問題 爛左 好難換
你搵呢間你覺得值唔值得推薦啊？
我曾經主理過兩間屋嘅裝修，兩間都全爆。
廚房浴室係最值得整嘅地方，雖然貴但物超所值。
同意浴室寶功能麻麻，但公屋果d豆潤浴室就ok
入牆傢俬只建議整睡房大衣櫃，廚／廁櫃，+/-廳嘅組合櫃，其他買現成，方便搬動
睡房冷氣一定要夠靜夠涼，最好換分體
電掣越多越好，我會整孖蘇添
地板就見人見智，我兩次都無換地板，因為無錢，但有錢嘅話換合成地板正好多
我兩次係唔同師傅
第一次係裝修師傅，價錢平，手工好，料又襟，但就比較老土
第二次搵設計公司，係朋友個朋友開，算友情價但都好貴，埋單又outbudget左1/5，仲要d嘢唔襟，廁所水泵用幾年就壞，木櫃有裂痕。但就全屋襯晒色，感覺靚好多。
4個讚
-
師傅既工藝同技術可以差幾個世代. 有人仲係80/90 年代, 有人用緊新技術. 講既唔係設計, 而係實際工夫. 以防水為例. 可以係差好遠. 自己留意
-
蘇位安排係重要, 如果你搵裝修公司, 佢地有責任幫你安排. 師傅就最好自己諗定. 全屋裝修計, 其實一般會建議, 實際施工前, 預番 1-2個月準備時間, 咁會好好多. 至少有清晰既平面圖 (附尺寸, 電制等安排), 廚廁櫃安排, 心儀電器型號及尺寸. 呢D 野, 應該係施工前已決定好, 千萬唔好等開工後等師傅幫你預.
-
電線整唔整考慮幾樣野, 本身用左幾耐? 下一次裝修預計幾耐?
廚房整得再靚都好, 下次整電線時要拆晒先整到. 如果今次唔整好個底. 就有心理準備個表面下一次要全拆.
我本身做裝修. 呢行千奇百怪. 蝕本生意無人做, 殺頭生意有人接. 切勿因小失大.
祝你順利.
5個讚
呢個師傅自己對設計有要求，所以基本上你想要的佢都會滿足到你，不過佢有自己的堅持，例如我想厠所水盆用坐入式多個檯面用，佢就堅持用碟式，我而家都有啲後悔點解會聽佢講，冇左個檯面我覺得唔夠實用。再睇多啲，而家諗返轉頭，可能係佢冇水位賺，因為佢帶我哋去揀磚揀牆紙同厠具都係得幾間，佢話就話係相熟，保證到係靚料，但又有機回係收回扣，所以都係嗰句，你要堅持自己想要的，唔好咁易就信哂個裝修師傅講。
因為好易漏水同發霉，維修亦麻煩d
依家好少人咁整
作為用家，我反而係自己要求整碟式
係呢個安裝手法黎講，其實兩者價錢一樣
不過… 買建材就真係有水位
1個讚
我會想要個廚房雙格既洗手盤，好多時可能一邊放洗左既菜或者未洗既野，都重有個位洗下野。
同有位就裝洗碗機，依家wfh真係洗足早午晚3餐
D櫃入面都最好要有間隔
就好似我冇提到，個廁所櫃完全冇層板
有budget真係做入牆啦， 我以前娘家冇做，張床條la成日掉d野入去，最驚係我試過見過條鹽蛇扒左入去，果晚真係唔使訓
1個讚
正路黎講無提都會有層板喎
有無叫佢加返？
冇啦因為幫我地裝修果個係我老爺
但
層板係好容易嘅事
諗定大型 / 季節性物品會唔會擺入櫃, 如果要， 留意櫃深度同間隔
大型 / 季節性物品包括 熨衫板、 晾衫架、 吸塵機、抽濕機、 暖風機、 梯
另外， 可考慮衣櫃要唔要防潮燈，要就同水電講定， 因為要拉線去衣櫃。仲有， 衣櫃加「鴨脷」（舊式衣櫃常見， 左右門中間有條木），防潮後果好啲， 但要習慣要開右門， 後開左門
最後，對師傅們客氣啲， 買定水/ 飲品放喺新屋俾佢哋飲，買啲下午茶請佢哋食，師傅會做得足啲
記得果時諗裝修。有個人提到係sofa位隔離要有個插蘇位。果然真係幫到好多。