等我分享下我既生仔經驗先。
我係第一胎，所以咩都唔知，因為住港島，所以揀喺養和醫院生。
原本預産期喺月尾，但係早左1個星期。
7月10號的早上7:30左右痛醒咗，之後每隔15分鐘痛一次，我當時心諗應該係作動，馬上去沖涼，之後叫左個麥當勞早餐食，食完吹完頭，大概10:30左右，忽然痛都無痛，大概食詐糊，我馬上上床訓教，訓到2點幾開始又痛醒左，每隔三十分鐘痛一次，當時老公返左工，所以諗住佢收工先去醫院check下，當老公收工，我又怕好塞車，之後諗住痛密啲先再去醫院，落咗樓去食燒肉，跟住每30分鐘就痛1分鐘，嗰種痛係完全講唔到野，唔識形容嘅痛，食完飯係屋企沖埋涼洗埋頭，點知去到12點幾痛都忍受唔到，每15分鐘痛一次，1點幾去到醫院，去到醫院5分鐘痛一次，上到去上面5分鐘痛兩次，護士一檢查，話我開咗兩度。痛到我成身震晒，完全冇力講嘢，嗰一刻我好後悔點解我要順產，(我順產其一係為咗想知道到底順產有幾痛，其二為咗BB健康啲），之後急call麻醉師幫我打無痛分娩，麻醉師兩點幾到醫院，幫我打麻醉針，當時我痛到震，佢利用我個幾分鐘唔痛嘅時間，幫我打咗支麻醉針，個感覺有小小麻痹，但相比起鎮痛，完全不是一回事，之後打無痛分娩針，感覺涼涼地，唔覺得痛，其實心裏面有啲驚，之後麻醉師同我講5分鐘左右就唔會再覺得痛，真係5分鐘之後冇痛嘅感覺，成個人舒服晒，我隱約記得大概三點鬆啲開始唔痛，之後仲有心情食咗個蛋捲，當時我係産房，老公就係旁邊陪我，啲姑娘定時定候就會入嚟睇吓我開咗幾多度，全程無痛，仲好好訓 ，大概8點醫生到咗，我開到八度，喺生產嘅過程中比我想像中冇咁辛苦，有四個姑娘協助醫生，個感覺好搞笑，四個姑娘好似啦啦隊咁，一齊幫我打氣，一齊數，幫我推下個肚，好有氣氛，真係媽媽士氣上升，佢係側邊教我點樣用氣，幾時休息，我老公就係側邊睇，幫我托一托頭，佢哋成個團隊真係令我事到功陪， 20分鐘我就咇咗個BB出嚟啦！
我好記得當BB出世，我當然喊到痴咗線，我老公好細心幫我抹下眼淚，抹抹下，姑娘係另一邊話BB好大力仲開咗眼添，我老公好自然抹抹下，放低紙巾喺我塊面度，走咗過去睇BB，完全忘記咗我嘅存在，醫生姑娘都喺度爆笑，原本我勁喊都忍唔住笑咗。
醫院仲送一張BB同我老公三個人嘅第一張合照，另外送幾張BB嘅大頭相，應該係方便送俾親戚朋友，仲有大紗巾。
成個生仔過程，好老實如果我早啲入醫院，應該唔使痛咁耐，而係生嘅過程當中，我個醫生真係好好，佢並不是網上話好出名嘅醫生，我同老公覺得太出名嘅，佢會好忙可能我想順產，佢都怕我浪費佢嘅時間要我開刀，結果我哋搵咗個冇劣評既醫生，柴逸蘭醫生，由初次檢查到生仔，都係佢跟，一來我同我老公唔係啲好麻煩嘅人，唔會超多問題，醫生又好Nice，比我嘅感覺好舒服，我成日聽人講順產好痛，好老實講打完無痛分娩真係生得好舒服，冇我想像中咁恐怖。
出院埋單大概11萬幾BB佔18k左右。
希望我嘅經驗幫到你哋。
