阿b本身一出世係醫院照左一個星期燈
接到番屋企之後每晚訓教就好難氹到佢訓
就要人抱住訓先訓得冧
由出世到現加7個月都係要氹好耐先搞得掂佢
每晚由10點開始扭
扭到12點半後再飲奶先肯訓
而中午時間都係要氹半個鐘或以上
但最多訓到20分鐘就醒
自己上網搵過好多方法
比佢喊1,2分鐘 再抱再安慰 再喊再放低
用奶咀 沖多小小奶飲啊
食->玩->訓cycle 但佢攰到係咁打喊露都唔願訓
但冇一個方法好輕鬆幫到佢訓教
有冇d咩方法係大家個bb本身都係要抱住訓 氹好耐
但最後又work 令到bb容易入睡?
唔係想一步登天 令bb自己入睡
只係減少到氹既時間 或令佢可以訓教時間長d
氹小朋友瞓覺真係要比耐性
你試下每晚唱/播同一首歌
當然係柔和純音樂
佢每次聽到同一首歌習慣咗就會知道呢個係瞓覺時間
媽媽加油 
佢一日瞓幾多轉？
係咪日頭玩得唔夠攰
你BB應該係高需求寶寶，可以上網google下。先了解咩叫高需求寶寶，你BB究竟咩原因不安或唔舒服？如果係安全感問題，可以試下用包被增加安全感，用米袋放心口（當然要小心處理）。如果係唔舒服，會唔會係肚風，或者肚餓？
因為每個BB都唔同，你要慢慢試下唔同嘅方法。
以下link係關於高需求寶寶,，可以睇吓先。
佢大便正常嘛？唔知會唔會係腸胃問題呢？如果係腸胃問題可以同佢按摩
乜都試下，媽媽加油呀！呢段時間嘅辛苦只會係期間限定，加油加油！
抱慣真係好大獲！
我會打側啊b，前後搵攬枕夾住佢！
不過都係會醒！
醒左一定要同我一齊訓先訓得著
想問，主要邊幾個人照顧bb？
如果得你一個，有冇方法搵多一個人幫手？
我擔心你情緒問題多過bb。
bb 5.5M後分房自己瞓
一開始一定會喊到爆炸
第一日喊40mins，第三日已經得10mins ，跟住已經0喊自己瞓，全程一覺瞓天光，講緊係一星期以內嘅事（媽咪當然要透過cam mon住bb有無嘢，但要忍心唔好過去）
如果係怕安全感不足我覺得唔使太擔心，因為我小朋友大個後就算返PN都好，未試過因為分離無安全感喊過
PS但我由NB開始養成習慣，唔會抱/un/拍佢瞓覺，我係科學養兒，效果好理想
你係working mom定ftm?
我大仔頭一年夜晚要抱住先肯瞓，日頭要响格離陪瞓🤦試過有一晚朋友結婚請飲，屋企人10：30急call攪唔掂要我飛返屋企。就係當年有人乜都圍住個孫轉，攪到佢勁痴身（只認我）。
但想返轉頭都好回味呢D時光（好變態
）認同YeahYeah方法要忍心，生活方式要由細做起，你B仲細可以train，加油吖
我細嗰個女都係，好似嚟攞我命咁，要抱要陪先瞓得到，而且早上床，但夜瞓著。
我試過扮瞓，關燈合埋眼好耐，但佢都唔瞓。都係由佢喊，喊到攰就瞓。
日頭同佢玩多啲，俾佢爬下play mat，玩下翻身，我有買學行車俾佢日頭通屋走，消耗佢電力自然快啲瞓。
我會買啲𧗠生七星茶俾佢飲，寧神安睡，佢瞓得好啲，我都精神啲。
多謝各位啊 
@Gold_yellow_hk 早3個半月到我哋都有播過youtube d baby sleep song 但對佢作用不太 所以去到4個月就開始停左
日頭大約訓3-4次左右
每次都大約15-20分鐘鐘就醒
個環境已經係盡量無聲同埋溫度適合
但夠時間佢就會自己郁下郁下 再開眼咁
望到有人陪佢訓 就會再訓 但冇人係身邊就會喊醒
@bestemily 我哋都有睇過高需求寶寶嘅相關資料
我哋都估佢係呢類型嘅bb
係凍小小同初生嘅時候都係用條巾包到佢實一實咁 但去到近3個月佢就係咁郁手郁腳拆散曬
最初照燈戈陣都比姑娘話佢成日踢到d被竇亂曬 
現加更加係包唔到 一包住佢隻手就反抗 點都要抽番對手出黎先肯訓
但都多謝你 我哋再詳細睇番你個post
@SorryBee
大便佢又成日都便秘
好多時都要3-4日先一次便便
但佢係人奶b 加2,3餐奶粉
因加固黎就便秘情況密左 有次試過近5日先痾
要係咁飲水加食蔬果先好d
但就咁拍佢個肚又唔係好有風咁
@Luckystar
真係好攰好辛苦 
唔抱佢又點都唔肯訓 之後就係咁喊
但晚晚抱到12點真係人都癲
@rilley
現加主要係我老婆主力照顧
我同我岳父岳母都有一齊照顧
我都好擔心我老婆d情緒同精神
所以先上黎求救下
@YeahYeah
頭2個月我都有提議過咁做
比佢喊下 但我老婆就唔忍心
聽到佢喊就沖過去
因為有次阿b試過個肚唔舒服 喊到聲都沙曬
所以我哋都唔太敢試呢個方法
但現加bb近7個月work唔work?
同埋你最初試係日頭定夜晚?
我哋有睇過呢個方法 有d話某d長氣bb喊成2,3個鐘都唔收聲
如果我已經令到bb打喊露先試用 會唔會有效多d?
@MagicAngel
我老婆係全職湊b啊
阿b都係勁痴我同我老婆身
佢大約2個月左右就自己認人
四大長老抱都唔太得 抱2,3分鐘就會望住我地眼濕濕 之後喊
甚至初期指定要我幫佢沖涼
阿媽同阿嫲沖都唔得
@Dragonmama2012
我哋試過扮訓
之後佢就係咁拍你踢你 如果分床就係咁踢腳同叫你咁
相反之前武肺冇咁勁嘅時候帶多左佢落街
一落到街就好易訓 同當晚都易訓d
但呢排又爆番都冇咩點帶佢落去
真心想問七星茶係咪堅有效
我有諗過試下買七星茶 但我老婆又唔想阿b咁細個飲太多呢d野
因為佢近排胃口都差左咁 唔太想飲奶咁
我女細個都係高需求寶寶，全埋身好痴身，3個月已認人邊個抱都唔得，我抱先唔喊。一歲前基本上都係24小時跟身，瞓就攬住佢一齊瞓先瞓得冧，唔係成晚醒（最癲可以一個鐘or less醒一次）。
潑一潑你冷水先，我都試過好忍心咁尤佢哋喊，喊通頂又有，喊到下一餐奶又有，試咗成個幾兩個月都無進展我都放棄，sleep train 唔係對個個Bb 都work。
你哋有冇用奶嘴？
我BB出院第二日都返返醫院住左5、6日,但佢初生時都好好湊,食飽就瞓,開住白噪音就得。但大大下,夜晚就要抱住氹好耐先瞓,試過3、4個鐘先肯瞓…不過佢日頭一直好易瞓,唔洗點氹,係夜晚煩D。最後我由佢,食飽唔瞓我咪去做其他野,洗下奶樽、洗下衫咁。我做好晒D野先去氹返佢,好快就瞓左。慢慢由抱住氹2個鐘>1個鐘>半個鐘,到依家15個月,抱佢幾分鐘,佢會踢開我,之後放落床佢自己碌碌下瞓左 
順其自然啦,bb唔肯瞓就唔好迫佢,你地做下自己野先,bb想瞓自然會瞓,大家都好過D 
奶咀、安撫巾/公仔都好有用,可以試試,我BB有呢2樣就易瞓好多~
有冇試吓買love to dream睡袋比佢瞓？我上網睇過d blog話好好用，睇下用完情況會唔會好d
我b絕對係高需求寶寶 
個個都話初生bb好易湊，得食、瞓、痾
但我個仔係加埋喊！係狂喊！
佢初生頭一個月試過連續8個鐘唔瞓，
抱瞓都算，佢經常性係連抱住都喊，
好多晚都係由11pm玩到3am，佢真係攰先肯瞓1 - 2 hr
仲要就算抱瞓，一放落床就醒，即爆喊，
搞到我兩公婆都好崩潰，我差d產後抑鬱
我見你都用過唔少方法
我分享吓自己經歷
我由我仔1.5month開始試，依家就快3個月
Cry it out / 由佢喊
總括嚟講對我仔唔work，佢係可以連續喊1個鐘唔收聲
呢個方法已經試咗2個星期，佢依然晚晚大喊多過30mins
唔單止唔work，仲搞到佢日頭情緒更差，更冇安全感，更扭計
Ferber Method
我覺得呢個方法對我仔比較work
如果好似你咁講，隔1， 2分鐘就安撫佢，咁呢個時間間隔係太短
我同我仔試Ferber, time interval係5分鐘，then 10分鐘，then 15分鐘
一開始佢依舊係喊足1個鐘，但堅持咗兩個星期，通常喊20分鐘，(即係5分鐘喊完，我去安撫佢一陣，跟住離開，repeat 2次cycle左右）佢就會瞓著。
呢個方法我只會夜晚用，緊記佢無論點喊你都唔可以抱起佢，要狠心d，只可以坐喺床邊安撫佢
我會細細聲同佢講嘢，拍心口，等佢有安全感。
試咗1個月，我仔夜晚就戒甩咗抱瞓，
仲有幾晚可以放落床，佢扭幾下就自己瞓著，唔使我安撫
建立規律
我就由bb 1.5個月開始同佢建立規律
固定食奶時間，沖涼時間 etc
於是就會摸到佢日頭幾時想瞓覺
類似係食，玩，瞓cycle咁，但真心冇人哋講到咁簡單
我用咗1個月時間先開始慢慢捉到路，
依家處於仲摸熟中的階段，都未係每次都捉到佢幾時想瞓。
打喊路，摔眼一定係扭眼瞓，佢表面上好似唔想瞓，會喊，我都會抱佢安撫一陣之後，照放上床繼續安撫佢。
睡眠儀式
你bb都7個月，我唔知仲work唔work
夜晚瞓長覺前最後一餐奶前會有固定嘅睡眠儀式
唱兒歌（固定個幾首歌），換片，著睡袋，熄燈，聽歌（同一首柔和純音樂，不停repeat），食奶，掃風，瞓覺。
睡眠儀式好重要，感覺似催眠bb一樣
令佢潛意識知道係時間瞓長覺了。
安撫物件
奶咀，睡袋，white noise，柔和音樂
呢4樣嘢都係我仔瞓覺必備。
朝早就唔用睡袋，想瞓時就開white noise
食同玩嘅時候記得唔好開。
朝早柔和音樂同夜晚又唔一樣，費事佢會混淆咗。
我唔抗拒畀bb食安撫奶咀，依家我仔啜一陣再加拍心口就肯瞓，但好似6個月就要戒奶咀，所以又唔知對你bb有冇用
加油，高需求寶寶真係好難湊
真係要畀d時間自己同bb，摸到邊個方法最work
堅持住訓練呀！唔好半途而廢
2個月咁細當然唔可以由bb喊啦
依家你bb 7個月唔train，以後更加train唔到（到識行識企）你同老婆無共識就無可能train到bb
我當時只係晚上比bb自己一個瞓，日頭我會同佢一齊nap，比多d安全感佢
晚上瞓前要建立一個routine，我自己係比bb沖涼，聽住音樂飲尾奶（已經用夜燈+拉窗簾），飲好奶擺佢上床跟住熄燈關房門
都7M，應該著手加固
飲少奶好正常