見BD生仔分享文唔算多，等我幫手寫下俾各位孕媽媽有個參考～
我36w已經見紅，但等到差不多40w都仲未有反應，加上醫生擔心胎盤老化會影響bb安全同埋bb胎位未係最好（塊面向出），所以決定39w5催生喇！
首先我響前一晚9點左右沖哂涼入st paul，之後安頓好哂，簽哂一大堆文件、測胎心、抽血、內診睇下宮頸軟唔軟，再見一見醫生。響準備訓覺前11點左右，姑娘會幫你塞一粒藥入去子宮頸個度令佢再軟d，之後就乖乖地訓覺等第二朝打催生針喇～
結果我居然隔左一個鐘就開始陣痛，我仲以為只係塞藥唔舒服，結果發現唔對路，用個app計每5分鐘一次，之後仲要增強到2-3分鐘一次，頂唔順同姑娘講，一睇發現已經開左2度，我都嚇一跳！即刻叫左姐姐推我入產房，半夜2點打俾我老公叫佢即刻黎醫院！
入到產房，姑娘們好忙碌咁set野，我亦都講左令我超級唔後悔既一句「我要打無痛！」
上網本身睇過麻醉科醫生可能要call，仲要係半夜，諗住都唔知要等幾耐… 結果麻醉師15分鐘度就到左，仲要快過我老公，打無痛期間我老公唔俾入黎，而打無痛佢地會先幫你打左麻醉針先，因為直接打無痛係超痛既據聞
個枝麻醉針就係腫腫地既痛，之後真係打無痛既時候就只有少少痺既感覺，同埋一下好似觸電咁～ 之後等左10分鐘，無痛已經開始發揮作用！（我本身以為又要等好耐）老公入到產房時我已經完全唔痛喇
簡直由地獄上番人間！
之後我同老公一直好輕鬆咁樣傾偈同埋瞓，亦都好穩定咁每兩個鐘頭開一度… 到第二朝7點嘅時候老公仲出去買埋早餐俾我食
兩個好溫馨咁樣撐枱腳同埋睇電視，我諗住個個都話生之前要食飽啲，咁就係咁食啦～點知姑娘話叫我唔好食太多，驚我一陣間會嘔返出晒出嚟
到咗10:30am嗰陣姑娘再嚟睇，話已經開到7-8度同埋穿左羊水，但係為咗唔想我等太耐，決定幫我加少少催生藥同埋減無痛藥～ 結果我對催生藥係極度敏感，落咗藥之後半個鐘頭就已經開始好痛、有陣好想屙屎既感覺… 結果就一大班姑娘入嚟幫手安排放尿、除毛，醫生同姑娘都好好，一直鼓勵同埋教我手拉腳撐咁push，仲俾埋笑氣我吸…雖然我覺得唔吸仲好，搞到好似抖唔到氣咁
而我都見到醫生拎住手術刀準備切會陰，即刻唔敢望，因為個畫面太恐怖喇，雖然到最後真係唔痛，好快我push左20分鐘就生左呀b出黎喇
大家真係記住練好手臂既力，因為生完對手好酸痛，成身散哂咁… 之後住咗醫院三日，過埋最後嘅蜜月期，就開始左地獄般嘅湊仔生涯啦
醫生：
我經朋友介紹睇方敏豪醫生，每次產檢$655一次，佢好細心幫你照超聲波，到bb大個d仲會幫你影埋4d相～唔洗額外俾錢出去影
每一次產檢方醫生都細心同埋有問必答，亦都好幽默，令到媽媽唔會緊張～另外佢亦非常鼓勵媽媽順產，我之前朋友係求方醫生俾佢開刀聽聞傷口非常靚
唯一要提既係，佢實在太忙太多人睇就算約左每次都要等1.5-2.5個鐘 媽媽們要有心理準備～
住院：
新裝修後所有野都好新，姑娘們都係有求必應～床邊有電腦仔，可以睇電視、聽收音機、上網、仲可以訂野食。另外會送一大包野俾媽媽用，大家可以睇下有咩包左唔洗去買喇
膳食：
佢地每個整點會送餐，不過要留意太近個鐘數，佢地整唔切就順延到下一個鐘，例如9:50am叫會11am前先送到。
味道方面野食，咁當然唔係好好食喇
但係同出面普通茶記係無分別既對我黎講～ 價錢亦公道，舉個例一個星米$60。
價錢：
生仔埋單$82849，當中包括手術費$42000、麻醉費$8000、基本產科收費$25000、仲有藥費$64xx同埋其他心電圖呀化驗費等等… 我係凌晨打無痛，可能因為咁樣會貴少少。
呀b既就$6652（未計照燈），當中包括$4200巡房、仲有一堆化驗費呀嬰兒護理費用等…
好似好多字咁…希望可以幫到大家喇
佢仲叫我忍到都唔好打無痛
