~我的02家族~(定期更新分享故事)

[TammyTam]

《被祂選中的人》

第十二章~別離拼圖(七)

陪過嫲嫲晨運及飲早茶後，
我本想執拾好衣物預備離開，
就在這時見到嫲嫲坐在梳化上，
但她的雙手竟然不停地抖震。

「嫲嫲，妳係咪唔舒服呀 ?」

我緊張地握着她的雙手說
嫲嫲見到我慌張的樣子後，
她立刻強擠出從容的笑容對着我說 :

「冇事 ! 我冇事呀 ! 可能尋晚瞓得唔好，所以有啲攰啫…係喎…妳執好哂野未呀 ?我叫妳老豆等陣去巴士站接妳」

「今日我唔番去啦，妳今日精神唔好，我都係留低陪住妳，怕妳等陣會唔記得食藥 。嫲嫲，妳入房休息下先，晏啲等我煮好愛心火腿通心粉，就叫醒妳起身，好唔好 ?」

我溫柔地拖着她的手，
然後慢慢扶着她走入房間，
安頓好嫲嫲上床之後，
我便立刻打電話給欣然。

「欣然，我嫲嫲今日有啲唔舒服，所以我唔想番屋企住，我想留低照顧佢，同埋我細姑姐星期日會番黎，到時我先番黎再揾妳」

「好呀 !睇住妳嫲嫲緊要呀 ! 」

「係呢…發叔件事點呀 ? 妳嫲嫲有冇同妳講啲咩呀 ?」我緊張地追問

「唉 !我嫲嫲好衰架，尋晚佢十點番到黎，佢就趕左我番房瞓覺，好似唔想比機會我追問佢咁，哈哈哈 !不過好彩我阿媽同我一樣咁八卦，我咪貼住房門偷聽佢哋講野咯 」欣然不忿地說

「咁妳聽到啲咩呀 ?唔好賣關子啦 !」

「嗰日我喺巷仔見到嗰個女靈體，佢叫做蘭姐。原來蘭姐同發叔之前都喺係街口間茶餐廳番工架，而佢哋關係除左係同事之外，佢哋好似重係好好朋友添。嫲嫲聽茶餐廳老闆娘講，自從蘭姐因急病過世之後，發叔佢非常之傷心，所以佢就辭職冇再喺嗰度做 」

「發叔佢真係好可憐呀…佢唔做一定係怕觸景傷情，咁又奇怪啦，發叔點解成日流連喺茶餐廳附近既…」我疑惑地說

「全因為小寶 ! 蘭姐佢生前好好人，佢每日收工之後，都會喺茶餐廳附近既後巷餵流浪貓狗，而小寶就係蘭姐生前最愛錫既狗狗，嫲嫲估發叔應該係為咗想照顧小寶，所以佢一直同小寶一齊流連喺後巷度…而嫲嫲覺得蘭姐既出現，可能係佢放唔低發叔…」

欣然邊說邊鼻酸酸
而我也仿如感受到發叔的痛…

#要真正放底一個人並不容易
#星期三繼續更新故事

希望大家看完故事後，會留低一個~讚好~送給我及分享故事

[Luckystar]

繼續追
多謝樓主分享

[TammyTam]

心靈雞湯(十一)

一滴墨汁落在一杯清水裡，這杯水立即變色，不能喝了；
一滴墨汁融在大海里，大海依然是蔚藍色的大海。
為什麼？
因為兩者的肚量不一樣。不熟的麥穗直刺刺地向上挺著，成熟的麥穗低垂著頭。

為什麼？
因為兩者的份量不一樣。寬容別人，就是肚量；謙卑自己，就是份量；合起來，就是一個人的質量。

#今晚將會更新第十二章別離拼圖
#THANKYOUALL

[TammyTam]

《被祂選中的人》

第十二章~別離拼圖(八)

“ 愁看殘紅亂舞 憶花底初度逢
難禁垂頭淚湧 此際幸月朦朧
愁緒如何自控 悲哀都一樣同
情意如能互通 相分不必相送
放下愁緒 今宵請你多珍重
那日重見 只恐想見亦匆匆
懷裡情人在怨 相愛偏不能容
情人無言地哭 心怎不隱隱痛 ”

嫲嫲坐在梳化上閉着眼睛，
陶醉地聽着影音機播放此曲，
而我亦靜靜地陪着嫲嫲細聽這首歌。

「紫玥，呢首歌我同妳爺爺當年好鍾意聽架。我重記得你爸爸細個嗰陣時，成日都唱比妳爺爺聽 」
嫲嫲感慨地望向牆上掛着的舊照片說

「嫲嫲，妳咁多年係咪都好掛住爺爺呀 ? 」

「當然掛住佢啦 ! 佢走左都不經不覺十五年了，我真係好希望，當我百年歸老既時候，我會再有機會見到佢…」
嫲嫲繼續感慨地望向牆上的照片說

聽完嫲嫲一直對爺爺的思念；
發叔對蘭姐離世的傷痛及不捨；
我開始真正明白~別離~是多麼折磨人。

到第二天中午，
見到嫲嫲的精神並沒有什麼異樣，
所以我陪過嫲嫲吃午飯之後，
我便搭巴士回家去了。
回到家後，我放下所有衣物，
便立刻致電給欣然。

「紫玥，妳宜家快啲上黎我屋企先，我嫲嫲今日喺屋企休息呀，佢今日係咁同人講電話，好似同發叔有關架」
欣然按着電話筒細細聲地向我說

我放下聽筒之後，
然後向媽媽交代好一切，
便步行去欣然家去。

我站在欣然門前按了門鐘兩下，

叮噹~叮噹~

「紫玥，妳終於返黎啦 ! 我等左妳好耐呀 ! 」欣然興奮地叫着

「欣然嫲嫲，妳好 ! 我又黎打攪妳 !」
我禮貌地先向欣然嫲嫲打招呼

欣然嫲嫲隨即放下手上的書本，
她側着頭，
然後笑着向我和欣然說 :
「妳哋兩個小鬼，一定有野想問我啦 !」

「哇！妳真係好了解我哋呀 ! 嫲嫲呀 ! 妳講比我哋聽啦，我哋真係真心關心發叔…究竟發叔係咪都見到蘭姐架 ? 」
欣然不斷搖晃她嫲嫲的手說

「好啦 ! 怕鬼左妳哋啦 ! 但係妳哋聽完之後，唔可以喺發叔面前亂講說話，知唔知道?」
欣然嫲嫲認真地望着我倆說

之後我和欣然齊齊點頭示意知道。

「其實尋晚我同發叔都傾左成晚，而佢亦都係尋晚先真正知道，近呢個月一直跟住佢同小寶既黑影係蘭姐。佢聽完之後，情緒好激動好傷心，係咁問我，點解係我孫女見到蘭姐，而佢只係見到一團黑影，唉！」

欣然嫲嫲連番歎氣後，
搖着頭再繼續說 :「我同佢解釋左好耐，唔係每個人都可以見到離世既人，就算係天生有陰陽眼既人，都未必一定想見到就會見到。我同佢講，欣然能夠嗰日有緣見到蘭姐出現喺你身邊，我相信可能係蘭姐想透過欣然，傳達一啲信息比你…」

#今宵多珍重此曲的確好傷感
#要完全釋懷已離開的家人的確好難
#星期日繼續更新故事

希望大家看完故事後，會留低一個~讚好~送給我及分享故事

[LuckyAda]

阿媽都有類似半透半截人經歷

[TammyTam]

《被衪選中的人》

第十二章~別離拼圖(九)

聽欣然嫲嫲同我們說，
原來發叔在五年前，
他是經營酒樓的老闆，
可惜當時他因沉迷賭博的關係，
弄到一身賭債，
他的酒樓亦因此變賣還債。
同時他的家人，
亦都一一與他斷絕來往。
就在發叔一無所有的時候，
酒樓舊員工蘭姐，
一直都在發叔身邊，
不斷鼓勵及幫助他捱過最艱難日子。
至於蘭姐，
她的丈夫早在十多年前，
因急病而離開人世，
蘭姐和她的女兒一直相依唯命。

蘭姐是個心地非常善良的人，
雖然她的經濟並不算富裕，
但她這麼多年，
都擔任某個流浪動物協會的義工，
而且更出心出力，
每日都到工作附近的後巷，
餵食一群流離失所的貓狗。

而向來性格急躁及勢利的發叔，
亦不知不覺被蘭姐的無私愛心影響，
他開始學懂生活上的快樂，
並不是取決物質及名利上。
所以發叔在兩年前開始作出很大轉變，
他接受了蘭姐的意見，
重新振作地做人，
願意由低再做起，
與蘭姐一起到街口的茶餐廳工作。

他們兩口子的生活，
雖然過得平淡，
但對於他們二人其實已經很滿足了。
他們二人結伴每天都一起上班，
下班之後，
他倆便將茶餐廳老闆捐贈的廚餘，
細心地逐一分配好，
然後便到附近所有後巷，
餵給流浪貓狗食用。
可惜這段安穩的日子，
在十個月前的某天，
蘭姐發現自己癌病竟然覆發，
到最後她更在兩個月前不幸逝世了。

「嫲嫲，我好想幫到發叔，同埋蘭姐想我傳達啲咩比發叔 ? 上次我只係見到蘭姐望住發叔表情，係好傷心同難過…」
欣然雙眼通紅緊張地問

欣然嫲嫲輕拍欣然的手說 :
「其實我呢兩日都有同發叔聯絡，經我不停咁開解佢，佢宜家心情算平伏左好多，但佢有個請求想欣然妳幫忙，就係想妳可以見下佢，望一望佢同小寶，因為佢好想知道，蘭姐宜家係咪仍然都喺佢身邊」

「梗係冇問題啦 !」
欣然用力將手拍自己心口一下

我望着她們二人為發叔及蘭姐做的一切，心裡感到非常感動。
但另一邊廂，我竟然有種失落感覺，
之前我曾有這種另類天賦感覺，但現在的我，已不能像欣然可以幫助到別人，
心內感到萬分羨慕，及希望自己封了的眼，可以快些有重開的一天。

#下一節欣然將會為蘭姐傳達最後信息
#我寫這故事時自己也忍不住喊
#感謝大家對我關心
#今日瞓足十小時了
#星期四會繼續更新故事

希望大家看完故事後，會留低一個~讚好~送給我及分享故事

[over9]

追x2

[TammyTam]

《被祂選中的人》

第十二章~別離拼圖(十)

我得知欣然嫲嫲已相約好了發叔，
明晚八時會在街口茶餐廳等。
而我亦懇求欣然嫲嫲很多次，
她才肯答應我，
明晚可跟着她們一起見發叔。

來到第二天的下午，
我特意向媽媽交代好今天晚上，
會到欣然家裡吃過晚飯後才回家。
媽媽點了一下頭後，
我便趕快走回房間從自己的小錢箱內，
取了一個五元硬幣放入袋裡，
因我記得上次發叔講過，
小寶很愛吃麵包店的美味麵包。
現在的我，可以為發叔蘭姐做的事，
可能僅只得這件小事…

我到達欣然家裡後，
時間是大約五時左右，
距離相約發叔時間仍有兩小時多，
所以我倆便坐在大廳，
邊砌拼圖邊閒聊消磨時間。
就在這個時候，
電話突然響起~嘟~嘟~
欣然拿起電話聽筒後，
便將電話筒遞給我說 :
「紫玥，妳媽媽揾妳呀 !」

「媽媽，冇事嘛 ?」我好奇地問
因媽媽未曾試過打電話給我

「頭先嫲嫲打黎屋企揾妳，佢好似有野想同妳講，我有問佢咩事，但佢好似神神秘秘咁，妳不如打個電話比佢先」
媽媽顯得好無奈地說

「好呀 ! 咁我宜家打比佢啦 !」

我與媽媽掛線之後，
便隨即打電話給嫲嫲。

「嫲嫲 ! 頭先妳係咪揾我呢?」
我笑着說

「紫玥，妳做咩唔拎條噹噹手鍊番屋企呀…妳係咪唔鍾意個款…」
嫲嫲語氣中顯得有點悶悶不樂

「梗係唔係啦 ! 就係因為我太鍾意，我先怕帶番屋企，因為如果比兩個妹見到既話…佢哋一定會搶我條噹噹手鍊玩架，條手鍊咁靚又咁貴，所以我覺得將噹噹手鍊放喺妳嗰度先係最安全」
我非常緊張地向她解釋

嫲嫲聽完之後，隨即笑了一笑。
「咁我幫妳將條噹噹手鍊，連埋金舖張收據，放喺我間房第二個櫃桶裡面，如果將來妳想轉第二個款既時候，記得拎埋呢張收據，知道嗎 ?」

「知道 ! 嫲嫲，我今晚會同欣然食埋晚飯先番屋企，因為我哋今晚有點事要做，至於係咩事，我聽日先慢慢再講比妳知」

嫲嫲連番甜甜地笑着說 :「好 ! 好呀 ! 咁我等妳聽日慢慢同我講」

掛線之後，我便和欣然繼續砌拼圖。

大約七時半左右，
欣然嫲嫲手執了一袋紙紮用品回來，
然後便叫我和欣然出門去。

當我們到達街口茶餐廳門口前，
我見到小寶坐在燈柱附近。
「發叔佢應該入左去，小寶真係好乖，佢係度等發叔」
我用手撫摸小寶的頭說

欣然靜止了好幾秒望着小寶，
然後她搖着頭說：「嫲嫲，蘭姐佢應該唔係呢度…」

「妳哋兩個記得等陣唔好亂講說話，知道嗎 ?」欣然嫲嫲一臉嚴肅地向我們說

我和欣然立刻點頭示意知道，
然後我們三人便走進茶餐廳內…

#星期日繼續更新故事
#感謝大家仍抽時間看我的故事

希望大家看完故事後，會留低一個~讚好~送給我及分享故事

[conymama]

深夜最愛追02故

[sunflowerlam]

每次都追住看,感情線描述得很細膩

[TammyTam]

《被祂選中的人》

第十二章~別離拼圖(十一)

發叔坐在茶餐廳最一角的位置，
他的神情非常憔悴，滿面長滿鬚根。

「發叔 !」
欣然嫲嫲溫柔地用手輕拍他的肩膀
發叔將原本散煥無神的目光，
隨即轉投望向我和欣然。

「欣然妹妹，阿蘭佢宜家喺唔喺度呀 ? 妳見唔見到阿蘭呀 ?」
發叔面容非常慌張地追問欣然

欣然立刻認真地凝視着發叔，
然後再仔細地環看四周的環境。
「蘭姐佢應該唔喺呢度…」

發叔聽完欣然答覆後，
非常沮喪地伏在餐桌上。

「阿蘭佢唔喺呢度啫，或者佢去左其他地方呢 ! 」欣然嫲嫲輕按着發叔的手說

「發叔不如你陪我哋食啲野先，因為我有啲肚餓，我哋食完晚餐之後，先再出去揾埋小寶一齊，周圍行下揾蘭姐，好唔好呢?」
欣然臉上充滿誠懇的目光，微笑着對發叔說

「好 ! 妳哋鍾意食咩隨便叫，千祈唔好同我客氣，今晚真係麻煩妳哋…」
發叔隨即遞過餐牌給我和欣然

在整餐晚飯當中，
發叔向我們分享了不少，
他和蘭姐做動物義工的趣事給我們聽。

當我們四人吃過晚飯後，
正步出茶餐廳門外找小寶的時候，
小寶卻不見了…

發叔立刻心急如焚地在大叫：
「小寶 ! 小寶 ! 」

「發叔，小寶可能行開左去玩，冇事既，我哋一邊行一邊揾佢」
欣然嫲嫲立刻安慰發叔說

發叔低着頭沉默不語好幾秒，
之後他即緊張對我們說：
「我哋去麵包店既後巷，小寶同阿蘭應該喺個度架，我同阿蘭以前每晚一收工，我哋都會喺嗰度開始餵其他流浪貓狗，佢哋一定喺個度等緊我」

我們三人隨即跟着發叔，
走向麵包店後巷去。

就在我們四人到達麵包店後巷時，
小寶果然待在後巷某一角處。
與此同時欣然亦停了腳步，
她凝望着小寶方向說：
「嫲嫲…蘭姐佢宜家企喺小寶隔離…」

發叔聽到欣然此說話後，
他即跑向小寶方向，
然後整個人跪在地上崩潰地哭着說 :
「阿蘭，我好掛住妳，好掛住妳，妳比我見下妳…」

欣然嫲嫲即扶着發叔的手說 :
「阿發，你冷靜啲先 ! 蘭姐佢應該有說話想同你講，等我孫女宜家問下蘭姐」
欣然嫲嫲隨後再向後巷牆角說：
「蘭姐，我知妳一定有事放唔低，所以妳宜家可以同我孫女講，佢會幫妳轉達比發叔知」

當刻的我，只能呆呆站在欣然身旁，
望着欣然喃喃自語。

欣然雙眼通紅地望着發叔說：
「發叔，蘭姐佢話今次輪到佢出承諾咭，你一定要答應佢，好好繼續生活落去，唔可以再過之前頹廢生活…」

「承諾咭…佢…真係我既阿蘭 ! 記得喺半年前我出承諾咭…要求妳到醫院做電療同化療…」
發叔邊擁着身旁小寶邊哭着說

#疫情反覆令我工作大變動
#感謝大家對我無限包容及等待
#星期六或日繼續更新故事

希望大家看完故事後，會留低一個~讚好~送給我及分享故事

[Judith]

但係死得好慘又同拉鍊星有咩關係呢?

[sunflowerlam]

好感人

[TammyTam]

《被祂選中的人》

第十二章~別離拼圖(十二)

欣然嫲嫲半彎着身子，
將一張張紙巾慢慢放在發叔手，
然後再用手輕拍着發叔的肩膊說 :
「你既堅強，會係對蘭姐最好既安慰」

發叔聽完欣然嫲嫲此番話後，
他情緒也開始慢慢平伏起來。

「阿蘭…自從妳離開我之後，我每晚都會枱起頭望向個天…不停係度諗，如果呢個世界真係有天堂既話，我相信妳已經喺天堂度生活，擺脫病痛對妳既折磨，而且妳重可以喺天堂，見番我哋之前照顧過既所有毛孩。但我真係估唔到自己…竟然成為妳既顧慮…連累左妳，我對妳唔住 ! 咁多年，妳一直做既任何事，永遠都係為我著想，而妳自己就永遠擺到最後。阿蘭，我應承妳，我會同小寶好好生活落去，妳唔需要再為我哋擔心，我會聽妳既說話好好振作，但妳都要答應我，妳要喺天堂嗰度等我，可唔可以 ?」
發叔隨即將視線望向我身旁的欣然。

而站在我身旁的欣然，
她則繼續向着空氣喃喃自語。

「發叔，蘭姐話，佢一定會等你，但你千祈唔可以心急，要隨緣。記得唔好飲咁多酒，唔好捱夜，要好好保重身體，同埋要記住今日你對佢既承諾」欣然語氣中帶有一點兒尷尬

發叔扶着牆角慢慢地站起來，
然後再走向欣然身旁說 :
「妹妹，阿蘭佢宜家企喺邊度呀 ?」

欣然立刻將視線望向小寶。
「小寶既右邊…」

發叔用溫柔眼神望着小寶方向說 :
「阿蘭，我宜家當住邵老太同兩個妹妹面前答應妳，妳可以放心，休息一下，我哋一定會再見 !」

「 生死有時，聚散是永不止，但終有一天總能重遇 」
欣然嫲嫲面帶慈祥的笑容，握着發叔的手說

「嫲嫲…蘭姐佢已經走左…」
隨即欣然整個人癱軟靠在我身上

「欣然，妳冇事嗎 ?」
我緊張地追問

「放心 ! 我冇事 ! 只係頭先既氣場好沉重，令到我覺得有啲透唔到氣，同埋有少少頭痛，今次係我第一次同…靈體溝通，原來係咁攰…」
欣然伸了一個大懶腰說

「我真係好感激妳哋幫忙 ! 」
發叔雙手合十向着欣然及欣然嫲嫲不斷答謝。

這晚的經歷讓我深深感受到，
最痛的，不是離别，
而是離别後
仍留在心坎內的所有回憶……

生命本是長短不一，
會有生離死别，
這些都是命中注定。
我們並不可逆轉，
也不可挽回。

第四波疫情既反覆令到各行各業，
經營非常艱難(包括我個行業😑)
家長和小朋友都苦不堪言😔😔😔
疫情除了影響經濟外，
相信衍生另外一個問題，
就係~情緒~
所以我時時都同自己講 :
「加油 ! 唔好氣餒 ! 我一定要有滿滿正能量，先可以開解到我身邊既人」

#感恩我有呢個專頁
#可以有你哋陪住我頂住
#大家記得每天都要裝滿正能量
#星期三繼續更新故事

❣❣希望大家看完故事後，會留低一個~讚好~送給我❣❣及分享故事
😚😚😚😚😚😚😚😚😚😚😚

[conymama]

好好睇,謝謝樓主繼續分享

[yanb]

好感動，好好睇呀

[TammyTam]

《被祂選中的人》

第十二章~別離拼圖(十三)

在當晚，
我親身感受發叔蘭姐的淒然別離後，
沒想到在這同一個晚上，
我竟然要親身經歷多一次…

與欣然眾人道別後，
我便急急腳趕快回家去。

「紫玥，妳終於番黎啦 ! 嫲嫲佢喺廁所暈倒，宜家送左入急症室，爸爸趕緊過去醫院…」
媽媽一臉擔憂地向我說

我腦海隨即停頓了好幾秒
「嫲嫲佢…佢宜家點 ? 佢喺邊間醫院 ?我宜家要即刻去睇下佢」
我雙手不停地抖震着

「我都唔知道…嫲嫲點…不如妳打電話比爸爸，佢應該到左醫院…」

當刻的我，心情既慌亂，又害怕。
我的手拿着電話筒時，
雙手不由自主地由心抖震出來。
「爸爸，你到左醫院未，嫲嫲佢宜家點 ? 佢有冇跌傷 ?」

「紫玥，妳宜家自己搭的士過黎醫院先，叫媽媽聽電話」
爸爸語氣中顯得很冷靜

「好…」
我便將電話筒遞給身旁的媽媽

媽媽接過電話後，
神情突然變得慌張起來。
「嗯 ! 知道 ! 好…」
媽媽放下電話筒後，
便走進房間取了一張一百元紙幣，
及她的手提電話。
「紫玥，妳袋好電話同啲錢，喺樓下巴士站嗰個位截的士，去到醫院即刻打比爸爸，佢會出黎接妳，知道嗎 ?」

「知道 !」我亦不敢再追問下去，便趕快到巴士站去。

在短短十多分鐘車程中，
我腦海不斷浮現了很多畫面，
就好像投影機播映般，
一幕幕放映着嫲嫲與我開心片段。

就在的士快抵達醫院急症室門前，
我在車廂內，
見到爸爸半蹲在地上沉思，
他神色非常凝重。
於是我趕緊叫的士司機停車，
馬上跑到爸爸身邊，
「爸爸…嫲嫲佢…究竟宜家點 ?」
我緊張地搖晃他的手追問

爸爸一臉目無表情慢慢地站起身，
然後他用手撫着我的頭說 :
「紫玥，嫲嫲佢啱啱…已經走左，我宜家帶妳入去見嫲嫲最後一面…」

爸爸所講的一字一句，
突然仿如一把鋒利無比的刀子，
逐一深深刺進我心臟般。

爸爸拖着悲痛的我，
慢慢走進醫院的小房間內。
我見到大姑姐、細姑姐、姑丈及賢仔，
他們都與我一樣悲痛非常。

「我帶紫玥入去同阿媽講再見」
爸爸收起悲痛情緒，向大姑姐說

哭成淚人的大姑姐，
她擁着身旁的賢仔說 :
「賢仔，同舅父表姐一齊入去，同婆婆講再見」

爸爸隨後左手抱着賢仔，
右手拖着我，
再走進另外一間房間裡。
我見到嫲嫲閉着眼晴躺在床上，
而她面上有兩處深深的瘀傷痕跡。

「阿媽 ! 妳兩個寶貝孫紫玥同珀賢黎左…佢哋同妳講再見，妳放心走…」
爸爸將賢仔放在我身旁，
然後他緊握着嫲嫲的手說

「嫲嫲…嫲嫲…」
我整個人隨即崩潰地大哭，
我用雙手輕撫摸着她面上的瘀痕。
心痛她面上留下兩處可怕的瘀傷，
而最令我最悲痛，
是我永遠再見不到她，
也再聽不到她的聲音。

站在我身旁的賢仔，
他突然間望向我身後房間門位置說 :
「婆婆 ! 婆婆 ! 」

#感謝大家對我耐心等候
#工作寫作休息我會好好分配
#希望大家仍繼續支持我

希望大家看完故事後，會留低一個~讚好~送給我及分享故事

[conymama]

好睇呀辛苦樓主了

[yanb]

[Baby.T]

紫月原來咁細個？
咁快個個有手提電話