之前出過一個post講我半年前大B自然流產
終於等左半年 (中醫嗰時話半年後先再懷孕比較好)
今個月終於可以再試造人
但估唔到無左大B既心理影響到依一刻都仲係好大
本身都叫自己放鬆啲, 不過原來時間黎到真係會好緊張…
怕唔中, 即使中左又好似上次咁,
就算安全過左3個月, 成個孕期又唔知會唔會發生啲咩事
我都知自己太緊張…
呢個都有關我公司既事 呢幾個月返工壓力好大
因為阿B+公司既事, 3月開始有呼吸困難
初初以為係換氣過度, 睇左醫生又話唔係
再轉另一個醫生睇, 就話我似係焦慮症 
甚至轉介我去睇心理醫生
但我本身有睇開社工 而覺得個社工好好, 都幫到我
就覺得未需要住
最近身體越黎越多毛病咁, 呼吸唔順外, 手麻, 呢度痛嗰度痛咁
返到公司呢啲唔妥既情況會更嚴重, 放工/放假又無咩事
其實個人認為似係自律神經失調多啲 (都係心理因素影響)
上網睇, 自律神經失調又會影響到懷孕
不過老公一個既人工唔夠養家, 加上疫情搵工難
所以我真係無辦法辭職
到底點樣先可以放鬆啲 
份工嗰度有冇其他位可以轉？
其實工作都係為兩餐，唔值得俾份工搞到自己咁大壓力
係工作量定係人事問題呢？
見到你話有社工幫到你，咁都好d
不過你話你症狀多咗又辛苦咗，如果時間/經濟上許可，不妨考慮吓醫生建議睇埋心理學家
有時候有d心結往往係某d人突然講一句說話就幫你解開咗
我上一胎都小產咗，我知道嗰種痛苦係點樣
而家再懷胎，30週啦
呢30週以來我都唔敢太開心，都好怕個胎會有咩突發事發生，慶幸暫時都順利
學林日曦所講，保持防禦性悲觀性樂觀
其實bb比我哋想像中堅強，即使途中真係有不幸事情，都唔係媽媽嘅錯，係冇人控制得到
作為媽媽要做嘅，就係盡量保持自己身心健康，繼續生活得好
上星期係我上一胎嘅預產期
當然我都有諗起佢，有喊，我有同天上嘅佢講，我哋一家人都過得幾好，希望天上嘅佢都過得好
我相信每個人本身都有佢辛苦嘅地方
你會上黎搵幫手搵人呻已經做得好好
希望你知道，你唔係得自己一個人，呢度有好多人每日都面對緊唔同嘅困難，大家互相傾吓啦
恭喜！工作係長命功夫呀，放產假時點都會放手2,3個月架啦，relax relax，唔好咁緊張
返工當有d人走嚟走去，其實有情緒病係屋企太耐會亂諗嘢，可以請一星期假，再番工。再睇下情況
返工可唔可以聽歌聽電台之類𨍭移下自己情緒？另外，放假時做下運動跑下步心情睇下會唔會好啲？
心理影響真係好難搞，要靠自己努力。希望你可以克服今次難關。
多謝你安慰我 
我公司係細公司, 所以無其他位可以轉,
其實只係某一個人有問題, 但無奈嗰個係細老細…
經濟上唔許可, 所以睇唔到心理醫生 (之前睇過真係好~~~~貴)
不過黎緊星期六會再見社工, 我會將呢個問題同佢講
之前搵社工都係因為阿B既問題無講過工作影響
恭喜阿B返黎你度 
我下個月都係原本預產期, 我覺得越近嗰日我會越sad 
其實真係對懷下胎又期待又恐懼…唔知點捱好
但真係感謝你俾我知道我唔係得自己一個人 
我未有BB呀, 只係今個月會開始返造人
但依家咁既心理壓力, 我覺得我好難成功 
疫情初期就係因為WFH多, 加上公司條煩友所以迫到情緒病
依家係公司係好過係屋企, 但見到嗰條友都係好辛苦…
即使佢表面上無做咩但我都好憎佢
(之前成日係背後搞小動作)
可以話, 我有聽啲心靈既野或者哲學類既野分散注意
運動之前都有做, 但呢排落雨就懶了 
好耐之前既抑鬱我都係靠自己走出黎, 希望今次都可以
多謝大家 
聽落你遇到位幾好嘅社工，我相信佢會幫到你，你再同佢傾下啦
世上嘅老細好多都係難頂嘅，包括我嗰個
佢要對你衰，其實真係控制唔到
我成日都諗: 老細真係最差嘅人辦，一路都提醒自己千其唔好變成佢咁
唯有盡咗自己份內事就算，佢要雞蛋裏挑骨頭咪做好少少，都唔滿意就佢自己做飽佢啦，我又唔係出佢份糧
其他難聽嘅說話，就佛系地一笑置之
You can never please everyone
自己嘅事都係，唔好俾條橡筋扯得咁緊
退後一步，放鬆少少，起碼皺紋都少幾條啦係咪
歡迎pm搵我傾計架
希望呢個星期六見完全好啲啦
真係好多謝你呀
我已經盡量做好自己可以做既野
不過佢要針我就真係針我
我依家只希望快D有左, 然後走去同大老細傾下
希望大老細可以體諒下 (大老細比較鍚員工)
你好樂觀呀~希望我都可以好似你咁 
樂觀都係經年累月被鍛鍊出嚟
諗番以前都會番工番到好委屈，無啦啦崩潰喺度喊
我份工要每日面對唔同嘅人，可能經歷多咗，加上年紀漸長，成熟咗，同時亦睇化咗，冇得強求所有人都鍾意自己，夾唔到都冇計啦，盡咗力就算
最緊要係搵到個”逃生出口”
真係好辛苦，就搵好朋友傾計
好朋友太忙，咪聽吓歌，獎自己買杯靚咖啡飲，就會好好多
bb ge 野隨緣啦
既然經濟咁有壓力
有左都唔係好事啦
咁緊張都冇用
我曾經都因為想生BB又有工作上嘅問題所以辭職唔做，但辭咗職之後過咗年幾都係冇BB⋯⋯所以比起辭職其實係自己個諗法更加重要。
即係大家都打工點解有啲人會好大壓力，有啲人又可以Hea下Hea下又一日。
我都後悔辭左職，當你辭咗職專心想要BB嘅時候壓力更加大⋯⋯
我自己都知辭職專心生仔唔WORK
所以我唔搵到下一份既話生仔既計劃都會延遲
但依家出面又難搵工, 搵到都唔知做唔做得長
到時無埋產假就唔係咁好 (我自己覺得)
辛苦都好點都會捱住先
都辛苦你啦
壓力愈大, 好似就愈難中, 唉. … i know ur feeling
我好明你，我都係好大工作壓力，晚晚OT，瞓唔到覺,iui咗幾次都失敗，黎緊要做ivf，但都因為工作推遲咗幾個 cycle
工作+ivf壓力倍增
多謝各位
我轉左工之後嗰個月就有左啦 
而家20週
經歷過上次 希望bb今次會順利出世啦
