發放正能量 表揚下屋企嘅好幫手
我家印尼姐姐剛續第二份約 大仔由出世到十個月因為我要返工日頭都係姐姐湊 佢好錫我仔 好有耐性又鍾意同佢玩 照顧佢起居飲食照顧得好好 有時姐姐嘅衛生同安全意識仲過先生 返工極少㩒電話 除非屋企人急事搵 以前返工睇cam都冇玩電話
到依家生咗第二個 細屋搬大屋 姐姐主力湊大仔同清潔 我湊細女同煮飯 大家分工合作 呢排細女食得差 姐姐仲主動叫我比佢餵 我姐姐性格好樂天又鍾意笑 當然姐姐有時都會做漏做錯 不過人無十全十美 請到呢位咁鍾意小朋友嘅姐姐真係好似中六合彩咁
分享下你哋姐姐有幾好
好正能量！
我第一個姐姐因為阿女一出世就湊，所以佢對我女好好，比佢湊好放心。姐姐好勤力，仲好鐘意煮野食，所以我好有口福
佢同我奶奶關係好好，我幫佢哋報左幾個煮食班，佢哋一齊上堂，姐姐有得學野好開心；奶奶有人陪佢學又開心。可惜佢屋企有事，完唔到第三張約就要走。
第二個姐姐煮食真係唔多掂，但佢好勤力，好乾淨，成日搵野抺搵野洗。我之前姐姐雖然都會抺野但都有蟑螂；但呢個姐姐佢對乾淨好「執著」
，真係晚晚大洗廚房，一d油煙都冇
佢又好早起身，我起身前除左我同阿女房，其他地方都清潔好，清潔程度令我非常滿意
佢同我女又夾到，又有耐性同佢睇書同玩，我本來驚第一個走左請唔返咁好，依家真係好感恩有佢嚟。
其實我哋做僱主真係應該多體諒工人姐姐，佢哋離鄉背井打工都唔容易。我自己對工人玩手機就冇乜所謂，做到嘢就得。我第一個姐姐會邊煮飯邊睇戲，有時做晒家務會坐響度睇鬼片第二個就鐘意聽歌唱歌，我都由得佢廚房聽音樂。
我家印姐姐由小朋友出世前做到而家幼稚園，好錫小朋友，而且做嘢自動波，唔使我煩心，每日一起身出房門都見到全屋好乾淨。佢會玩電話，但一定係做晒嘢先玩，最意外係連樓下看更都同我講，話我姐姐好似幾好，因為唔似其他姐姐咁，出出入入都拎住部手機篤。
要挑剔嘅係照顧小朋友太周到，搞到小朋友變咗老馮，自理仲爭啲。但我知呢點我都有責任。
姐姐喺 bb 未出世前一個月到, 而家bb 11個月大, 好錫bb, 每日自動自覺清潔屋企, 買餸煮野都幾好食. 屋企基本唔需要我操心, 好乾淨企理.
特別想讚係bb 行BLW, 會食到周圍都係, 污糟, 我事前同佢溝通好, 佢每日都清潔得好仔細, 同好樂意, 因為佢都認同咁樣可以培養bb 良好飲食習慣, 好用心對bb 好.
之前星期日放假返屋企會第一時間過去抱bb 話掛住佢 (我感覺唔係做比我睇, 同埋而家疫情就無, 即刻沖涼先).
總括黎講, 非常感恩請左個好助手!
我家姐姐由大仔出世前一值幫我到宜家，已5個contract. 愛我們、照顧我們有如家人。
當然有不足之處- 如梁詠琪式打掃
，咪就當訓練下兩個仔學習執拾囉。除此，姐姐係廚藝高手，中西日食過一次就曉，每日有新鮮手搓包食。
但最大鑊長期糧尾
經常要借糧接濟佢。
哇。。。你地真係好好運呀，請到啲姐姐咁好既
雖然我無請姐姐，但好開心見到你地話請到好姐姐，好有正能量，好有愛。
我家工人姨姨做咗12年多喇，係大仔6個月時有份見嘅，難搞bb被工人姨姨抱住，無扭，pass!
3年後之後細仔一出世，佢一直都好錫兩個，從無脾氣面色，就算奶奶唔多鍾意佢 (初時同住過年多)，搬走咗都屈佢偷野 (之後响99屋企搵返)，佢一定無投訴！當然，我都對佢好客氣，特別係教d細路要有禮貌
佢年紀差唔多50喇，無話做到幾時，可能真係做到d仔大，有朋友唔係幾好運，請極工人都唔啱，但佢係我地第一個，好可能係唯一個工人，第二次續約時佢同我講：好感激我對佢嘅信任，就算係佢初初到我地屋企，我地不單無裝cam，亦無一日打電話返去check佢
佢都有玩電話，有同校家長話佢賣野俾其他姐姐，在我，要求好低，只要孩子安全，家務做到9成，我就收貨
我姐姐都好好，好錫我啲小朋友，又係鍾意研究下整新野食俾小朋友，二個小朋友都鍾意同佢玩。清潔就一般，但有時我放假湊左小朋友出去，佢都會主動大清潔，最緊要唔計較又唔貪心，好樂天。所以有時佢玩電話我都由佢，講真，我返工都會玩下電話，唔影響做野，無出錯我ok
你係用邊間agent 請既
我姐姐好好，做野企理整齊，記性好，錫小朋友，煮野食好好味
我全屋既人都鬧過，唯獨無鬧過佢，因為真係好放心俾野佢做
我都好開心有個好姐姐, 呢個姐姐之前係湊開我老公個公公既, 公公走左之後, 佢返左鄉下, 過左半年, 佢想返黎做, 咁岩我原本請開本地姨姨湊, 都話湊到K3 就唔會湊, 咁機遇巧合下, 姐姐想返黎做就請左佢啦!! 本身呢個姐姐識講普通話, 少少中文, 英文反而麻麻, 可能佢識講中文啦, 好快就同我仔熟左。
睇得出佢都好鍾意小朋友, 平時好有心機同我仔玩, 會同佢一齊砌lego, 玩火車, 請姐姐最重要都係湊好我個仔, 有時知道佢陪我仔玩為主, 佢唔係成日可以抹到屋, 大執間屋我都OK, 最重要佢同阿仔相處得好。
咁我放假時, 自己湊返個仔, 姐姐就可以星期六專門做清潔咁囉…呢個mode 我哋一家都習慣左, 只要姐姐湊好我個仔, 做返基本每日吸塵拖地我都覺得好好啦!!
始終好姐姐真係唔易搵, 有時我買嘢食都會預埋佢, 每個月就比市價畀多少少佢當零用錢, 哄吓佢開心!!