B1學生班家長，一到填升中大抽獎表格時，總係成日問呢個排會唔會太搏，嗰個排法會唔會派得好差，攪到我忍唔住又要出篇嘢廢嗡吓。
好多小學都有不同理由，叫家長要保守D，相信不少家長都聽過：老師叫B1學生搏1至2間B1中學好啦，最遲乙3要填B2中學；或者叫你一定要填晒30個志願，否則唔知會派去邊等既說話。但呢D說話，係咪真心幫你呢？
各位B1學生家長，先問下自己，你認為大抽獎有填都抽唔入既學校，會係咩學校呢？
反思題目：
(1) 如果係 真B1組別學生 ，大抽獎填咗但入唔到既學校，代個間係咩學校呢？
(2) 中學點先可以做全英中或開英文班？
反思的回應：
(1a) 當然係受歡迎既B1中學，因為太多人爭自己隨機號碼唔夠前囉！
(1b) B2中學？有可能嗎？的確係有可能，但家長絕對係可以控制到最差既結果。
(1c) B3中學？？？有可能嗎？？？只要有做好功課，發生既機會低過中六合彩頭獎。
(2) 需要收夠85%屬全港排名top 40%（即係B1+B2A）既學生先可以做全英中。要開英文班每班亦要有至少85%屬全港排名top 40%既學生先可以。
反思的分析和解說：
B1學生派去B2中學，係過往強調既最差結果。一直都話就算區內B1學位不足，只要肯加多兩三間B2中學，一定會派到，其實大家點解仲咁驚，咁易俾D小學教職員嚇親呢？
相信好簡單，何為學位夠和何為加夠保險線，就係因為缺乏咗一個硬指標俾人去參考。所以我又諗咗一排，得出以下最新既建議：
B1學生加統一派位時，第一間係派位表上填上未能全開英文班既學校，就係B1學生既止蝕位（即係最差既結果）。
試諗一下，如果你小朋友係B1學生，統一派位派唔入個間學校，代表咗D乜？就係 個間學校統一派位學額已盡收B1學生 。
一間係統一派位可盡收B1學生既學校，即係已有至少65%學生係屬於B1，相信自行階段差極都會收到一堆B2頭學生吧！
咁理論上，呢間學校，極大機會夠資格開晒英文班，或至少開到多於一半班數既英文班。但呢間學校係咪真係咁呢？可以全開英文班？
可能有人會話話，會唔會因為今年學生人數太多，令過往未能全開英文班既學校，今年出現收爆B1學生既情況呢？
答案是：有可能的，但機會率一定細過你中六合彩頭獎。
原因好簡單，通常未能全開英文班既中學，佢地既英文班，主要係因為有足夠既B1和B2A學生先開得成，而且相信B2A佔大多數。所以就算多咗人揀佢做保險線又跌咗落去，都係先令原本有機會抽到呢間學校既B2生少咗機會抽，要令到B1學生都抽唔到係何其困難。
而且最重要係，就算幾千幾百個家長去抽，會唔會大家排位一樣，連所揀既非全英中都一樣呢？
如果學校再叫你乙2/3就放間非全英文中，或者同你講，你排得咁進取，只會連B3中學都入唔到呀！呢個時候、你應該問清楚自己，呢D說話係咪合理呢？
記住，無論係呢度任何人，或者小朋友學校既教職員，佢地俾既意見，你只需要參考，唔需要跟足，只需按自己認為最安心既方式填表就可以了。
你跟咗人既建議而派得唔好時，人地最多咪送你一句：Sorry！我都估唔到會派得咁差！
因為最終要面對派位結果既人，只有你/妳和你/妳的子女。
