- 英文非常重要，考直私基本上 10 間 9 間都有涉及英文。反而普通話就冇咁多。英文口語能力要夠生活化，老師可能問你搭咩交通工具，畀國旗然後問呢個係咩國家（中英美日韓呢啲係基本），平日邊個照顧，星期六日去邊度玩。
1.1 但唔好忘記上小學前要打好中文底子。唔少學校英文就好多資源，中文反而少啲，你自己唔做野等學校教，到時候上中學就小朋友辛苦。 - 查清楚邊啲學校做卷，邊啲學校要父母一齊見。如果小朋友支筆唔掂，你報啲要筆試嘅，咁即係浪費時間。如果係父母一齊見，咁麻煩各位媽媽操 fit 你啲位 C6，make sure 口供一致唔會亂講野。好多時候係班爸爸埋門一口講錯學校名，唔知自己小朋友喜好，唔知星期六日家庭日係做咩，話唔鍾意宗教都夠膽講。
- 訓練小朋友用完整句子對答，有頭有尾。有啲小朋友口語能力冇咁高，講中文同英文都會句子組織唔靚，例如：Your favourite colour is what/做完功課問媽媽去玩公園（我會做曬功課先問媽媽可唔可以去公園玩）
- 孩子活潑主動，已有優勢，好好利用佢呢一點。
- 面試班未必有用，但可以幫你小朋友明白面試流程，咁到時候小朋友情緒會穩定，唔會發脾氣、喊、扭計。面試班亦可以幫忙訓練小朋友留意指令，同埋訓練孩子眼望人，有問有答。
- cert 未必有用，但 cert 背後嘅課程有用，例如 starters、GAPSK 課程可以幫你小朋友踏上第一步。
- 自理能力好重要，小朋友要識自己扣鈕、著外套，女仔著裙要識整直條裙先坐，自己抹嘴等
- 禮貌很重要，基本唔該、多謝、笑容、記得擺返好凳、拉凳放輕、行樓梯腳步放輕都要識
- 部份學校考群體互動，每組一定有野係缺漏（顏色筆冇其中一隻顏色，切拼圖缺其中一塊），要懂得分享同主動問。
- train 學術要識得變通，數學要好似一年級長問題咁，妹妹有 6 個，哥哥有 8 個，佢哋有幾多個？蘋果 5，媽媽有 10，媽媽可以買幾多隻蘋果？
- 中英認字非常重要，請多伴讀。
- 如果係超大 B，記得唔好怕直私全軍覆沒，第一年玩左先諗，玩完有經驗，第二年就知咩學校有咩要求。就算唔係熱門學校，超大 B 都唔包 offer。
- 活躍唔係問題，但一定要識坐定。
18個讚