想請教吓大家, 我唔係同男朋友同居, 所以好難24 小時陪住佢身邊, 我有時間既話,都一定會陪佢, 但佢唔希望我專登抽晒所有時間陪佢, 好似平常咁, 一星期見2-3 次就好。但我係擔心佢既, 佢夜晚瞓唔到, 而夜晚係最容易情緒低落同失控, 基本上, 佢有齊抑鬱症既病徵, 唔想返工, 唔想見人, 瞓唔到, 無胃口, 有時會有幻聽。
佢唔願意睇醫生, 唔想食藥, 因為食抗抑鬱藥, 佢覺得會令佢傻懵仔, 佢亦都唔相信啲藥幫到佢。佢同我講, 一直都係靠自己意志去控制, 但佢怕有一日, 佢都無埋呢個意志就唔知會發生咩事。
我未遇過呢啲情況, 想請教吓大家, 有無啲咩書, 或者網站可以幫抑鬱症病人既身邊人了解吓件事, 可以點幫佢? 應該要點做, 先唔會愈幫愈衰?? 感謝大家既分享~
1個讚
以前我都曾經經歷過抑鬱症，
係會成日喊，覺得人地唔明白自己，無胃口食嘢之類，覺得自己好無用之類。
後來我媽咪成日帶我去玩，
同我傾計加上食藥就好番拉。
試吓多啲帶佢參加唔同嘅活動。
2個讚
真係要睇醫生，食藥會有幫助，但的確會有副作用。多陪伴，多運動，可以令個人多啲動力/提振情緒。都要讓同住嘅親友知道您男友嘅情況，避免憾事發生（要先同男友商量）。
1個讚
俾個攬攬你先，做有情緒病既身邊人真係要有極強大既心胸同耐性。
好仆街咁講老實說，有得走就走，依家未同居仲未真正燒到你，到一齊住就走唔切。我知道係人都會有情緒起伏唔應該因為對方一時放負而放棄關係，依家我就係身邊果個係咁而無得放棄，所以勸你有得分手就分手。
唔放負講經驗，
唔好同佢講加油，因為佢覺得自己已經好努力，如果仲同佢講加油佢會覺得你認為佢無努力。
唔好叫佢睇開d，因為本身佢已經自信心跌到落谷底，你叫佢睇開d即係加多腳話俾佢知睇唔開係佢既問題。
唔好同佢講將來，i mean唔洗同佢plan咁遠既事物，因為佢地好鐘意講下個星期我都唔知仲在唔在人世，baby step講下午做咩好，最多講下星期做咩好，例如去個未去過既戲院搵場戲睇下，俾輕輕既期待俾佢期待下星期既來臨。
諗辦法同佢見太陽同吹自然風，更好既係同佢一齊做運動，出下汗個人會心情會好d。
我果個依家既目標係2024去英國，當上年佢自己個心諗走定唔走時病發過幾個月，但煩緊乜野都唔同我講，淨係間中就話自己下個月唔知仲在唔在生，有時又叫我佢有咩事唔洗理老爺奶奶叫我返阿媽度，有一次最嚴重佢趕我走佢話想自己獨處一個星期，但到我執野時佢先爆佢諗緊乜野。
希望你果個都俾到導火線你知，至少同佢溝通時都可以避重就輕。
抑鬱症係有得食藥係有得醫同埋係可以斷藥，前題係佢地願意去接受自己只係病。
10個讚
一定要睇醫生，其實抑鬱症而家好普遍。我同事，朋友，好多有睇精神科醫生。醫生會開d瞓覺同放鬆藥，佢哋食左瞓到覺，心情都好d，真係好小事，即係感冒睇醫生咁。
本身外國都已經係好普遍，但華人社會就覺得你係痴線。
同意呀，不論有無抑鬱症只要訓得唔好都影響心情，休息得唔好對佢地既影響更甚。
1個讚
我覺得除咗醫生都無咩人幫到佢，佢覺得食藥會變懵只係佢主觀意念，抑鬱有咁多唔同藥，隻隻藥都唔同。我身邊無人有抑鬱，可能係無話我知，但我睇幾個kol (e.g. emily, jennifa) 分享過經驗都係睇醫生，試唔同既藥。所以可以俾佢睇下人哋經歷，病向淺中醫。
Agree
有幻聽，一定要睇醫生，如果係思覺失調，早期治療有機會好，把握時間。
腦分泌失調會傷害腦部，不要抗拒食藥。
圖書館借D精神科/醫院有關的書，增加對病的認識先。
有幻聽已經唔只係抑鬱啦喎
4個讚
之前睇森美訪問都講過，佢都係睇醫生先自救到，一定要睇醫生，搵醫生幫佢
我都有朋友係咁，講呢啲完全焫左佢。我地而家唔會見到，佢呻嘅時候我應該講乜先岩聽？
唔想睇精神科 一係睇下輔導 解開下啲心結會有幫助
3個讚
我都係左睇右睇綜合出黎最大路果幾樣野。
“你都已經好努力…”
“我見你都好俾心機…”
“凡事幾可盡如人意，你已經盡左力喇…”
“個個人都有情緒起落，唔一定日日天晴…”
“人有情緒好正常呀…”
“雖然我體會唔到你既感受，不過我會起你身邊陪你過…”
“我想去乜乜乜，下星期六你有無時間，你陪下我丫”
8個讚
即刻save低，感謝
見心理學家/輔導都會唔使食藥,但就需要長時間見,你睇吓佢會唔會試吓
係唔係返吓教會都好?
其實我都有上網睇過吓, 唔好否定佢存在, 要畀佢知道佢自己對我好重要, 唔係佢所講既無用, 廢人。佢同我講覺得自己好慘, 我知道我唔可以否定佢, 只可以講吓其他嘢分散佢注意力。但當佢情緒失控既時候, 佢存在價值真係好低, 佢而家都係靠自己去死撐, 佢唔開心, 覺得呢個社會唔應該係咁, 佢腦海會諗一啲傷害到我同我啲貓既畫面, 佢好驚佢有一日會傷害我, 所以唔肯上黎我屋企玩貓…初初諗住玩貓都可以幫吓佢, 點知佢好抗拒
呢啲, 我哋正常人一定係咁樣諗, 但係我唔可以迫佢, 好多文章都係有講, 要病人自願睇醫生先得。當然佢嚴重到傷害人, 都唔到我選擇, 佢應該會被迫要睇醫生。
我有提議去邊度行吓玩吓, 佢會答我: 睇吓嗰日攰唔攰先, 佢無直接REJECT, 但都留有後路, 未必一定會出現。我同佢講, 等遲吓無咁熱可以跑步, 佢會答我: 到時先算。
你老公係唔係都會對你冷淡? 我男朋友完全提唔起興趣, 對我無之前咁熱情, 唔會主動攬我錫我, 就好似乜都唔想做, 唔想郁咁, 我而家搵佢出街, 佢都仲會出黎見吓面, 我真係好擔心, 將來有一日, 佢連我都避, 而且佢亦都唔畀我上去佢屋企, 佢話唔鍾意有轉變, 屋企係咁多人就係咁多人, 一有轉變就好反感… 