//回歸祖國之終極藍領篇 (長文慎入) 
是咁的，塵氏身為一界死窮撚，好細個已經加入左黎家軍
黎生一句“我嘅訴求就係返工，無其他啦！”到今日都依然係咁發人心省
。
塵氏唔係咩專業人士
，搵工真係好general。唔係想放負
，只係想講自己嘅經驗比大家聽，塵太覺得祖國搵工都唔係真係人地講嘅咁容易
，打個電話就有工開，現實係求其一份市中心侍應兼職都可以過百人申請
，超市收銀都要過幾關
，或者好多要求你自僱或者要有車牌
，連housekeeping/ cleaner都要你有相關經驗
，你無相關經驗喺Indeed 連申請都唔比彈返你出黎
…… 當然，如果閣下係專業人士就另計啦
。塵太因為由day 1 已經要考慮埋照顧小塵生，所以一路都係搵兼職，但感覺上兼職係易請過全職
，網友們有搵全職經驗歡迎補充。
因為塵太眼鏡嗰度張contract 其實一星期得幾個鐘
，計過條數咁唔係幾掂於是塵太喺新一年又再搵part time，搵啲可以唔用腦
（因為眼鏡份工好多嘢記的），搵啲可以唔使同人講嘢（因為眼鏡份工有好多嘢講），搵啲可以唔影響我接小塵生放學
（因為我係個C9），所以塵太都好揀擇，而能夠附合要求嘅工其實都唔多…… 最後，終於比塵太喺搵到，係終極藍領工
～ 大家都會講，移民你乜都要做㗎啦… 清潔你都要做㗎啦… 係啦，答案就係做Cleaner啦 
……
老老實實，曾經作為一個高薪厚職嘅全職白領
，黎到祖國，要轉行仲要做Cleaner，其實真係極大極大極大嘅衝擊 但呢份工有£9一個鐘，返朝6至朝9，唔使用腦，唔使同人講嘢，接到小塵生放學，無需經驗，又真係附合曬我條件
～ 最重點係無其他公司請我，仲要第一次約我見面嗰位女士好nice，傾下計就幫我填form做DBS
，我行半個鐘返到去，車錢都可以慳返，所以我就硬住頭皮開始皮肉生捱……
塵太份工係喺大專做清潔，喺啲職員同學生返學之前就要開工，成team有廿人，每人負責一部份地方。唔使問塵太有咩做啦，屋企清潔要做乜就差唔多嗰啲嘢啦。開頭做塵太都有啲懷疑人生，問自己"我做緊乜"？ 塵太成世都無諗過自己會做清潔 塵太問家姐，比你黎到祖國你做清潔制唔制？ 佢問我“點解唔制？你喺屋企都要做㗎啦呢啲嘢，不過屋企做無錢收～” 咁又係，做一個鐘有£9，慳慳地都夠食兩三餐
於是，做做下就做左三個星期… 公司仲要係每星期出一次糧，好快有水回塘
今日聽啲同事吹水，有個本身做緊學校嘅飯堂，幾好搵，另一個同事佢話自己單親媽媽，阿女大個啲可以做自己想做嘅嘢，佢想做教車師傅咁話~ 而塵太就唔使多講，就係因為佳哥當日頂綠帽從而改變世界從而要離開從而回歸左祖國… 每個人都有自己嘅故事…
總結，返到祖國，大部份人都要轉行重新上路。搵工返工事實上英文都係一大障礙，你本身嘅工作能力係會因為語言障礙大打折扣，同事間吹水可以完全插唔到咀，因為連人地講乜都未聽到。移民要做藍領，聽人講就聽得多，但實際上，做藍領你又係咪真係接受到？過唔過到自己嗰關呢？搵工就算幾難我相信最後都會搵到，爭在做咩工要搵幾耐嘅啫～ 其實真係無計，為左下一代
，為左豉油嘅空氣，已經無回頭嘅空間
萬事起頭難，幾難接受都要頂硬上，大家要過到黎就一齊努力啊
香港人，比啲爭紮～
//
有個朋友係MBA畢業, 話黎到洗碗都做，但幾個月都冇聲冇氣我都冇問。。。
多謝你