題外話，我呢邊唔少手語節目，我小朋友學校都有教手語。
我最細果個同你小朋友差唔多大，教佢手語好易上手，都係表達自己嘅方式黎，你可以YouTube 搵下Mr Tumble, 小朋友都好鍾意睇同學習。
樓主你係咪好少時間同小朋友傾偈同交流？
係咪好少時間同佢講嘢，叫佢做啲咩咁樣？
依家先岩岩學識拍手
佢公公婆婆成日同佢講嘢，
可惜都係唔出聲。
同佢玩會笑到卡卡聲。
唉… 我都好明白你, 因為我細仔一歲九個月, 又係未識叫媽媽, 不停BB話
嘗試過教佢講嘢, 佢一FEEL到我哋教佢, 佢就會擰埋一面
我壓力大到連續幾晚夢到佢終於識講嘢 
只係識講唔好。 
只要發到音，講到單字都唔怕，可能只係學講嘢學得慢。最緊要係有交流，歲幾BB係聽得明指示嘅，只要聽完指示識得跟住做，咁多數冇乜問題。最怕係呢個年紀仲聽唔明指示同人哋嘅說話，冇交流冇互動，咁就要見下醫生了。
佢係邊隻教唔ok 呀？
佢肯講bb 話即係佢都想溝通，但因為某啲原因堅持用自己方式溝通。或者佢bb 話時幫佢代答「哦，你想搵媽媽，叫媽媽比水水bb」，一係慢慢哋扮聽唔明佢嘅要求
我發現多嘢講嘅bb 佢哋嘅照顧者都好識得自言自語！或者你可以咁樣陰啲陰啲比多啲input 佢。
加油！我小朋友都有其他問題，啲顧問姐姐話其實爸爸媽媽接受同肯面對問題已經係幫到小朋友一大步，而每個小朋友click 中嘅位都唔同，只要keep 住試同用唔同方法試，努力係唔會白費。
1個讚
其實你個小朋友同我個女一樣，都係自閉症傾向
係天生嘅，唔關你哋有冇同佢溝通事，當然你好盡力及有方法去同佢溝通係會有改善，但係個小朋友係咁樣無人需要負責任
真係要追究責任，父母長老祖宗18代都有分，因為係父母嘅genes先遺傳到有自閉症
首要就係大家都要接受個小朋友係有自閉症先，唔好將個責任推嚟推去
就算唔返n班，到夠年齡一樣要返k班啦，咁不如唔好嘈咁多，等多幾個月始終都係要返學，返學後可能會有改善呢
讀唔讀特殊學校都係自己揀，你想佢讀普通學校咪讀囉，最多同人溝通無咁叻姐
自閉症又唔係咩絕症，又唔係弱智低能，都唔明點解要咁反感，大把天才偉人都係有自閉症啦
4個讚
係，我都係咁同長老講。
我覺得都唔似弱智。
幾個月前重肯叫爸爸媽媽。
最近唔知做咩？
唔肯叫。
除咗好似上面咁引佢講
你哋都可以單方面講野架
開好水佢就走埋嚟沖涼，你哋可以照講「我哋依加沖涼喇，玩水水好開心呀！」
俾佢聽多啲唔同嘅字詞，刺激下佢，小朋友其實不斷吸收緊
到有一日佢準備好，可能就會不停咁講野
1個讚
自閉唔一定弱智
1個讚
今朝我想轉台，
同佢講媽咪依家想睇電視，
比媽咪睇一陣好唔好？
佢不停檸頭，
我真係轉左佢既電視，
佢呀呀呀咁叫。
感覺佢係知道既。 
小朋友有事，會有好多人出黎怪責媽媽，好無奈。去做評估，等專家說話啦。唔好俾情緒搞到自己先。
好多人會好心俾意見你，叫你做呢樣做個樣幫個小朋友。但個D好心，都剩係想幫小朋友，唔係幫你既。
記得對自己好D，在能力範圍內，對小朋友做曬評估和訓練，跟左專家意見，就夠架啦。其他野係個天決定，唔到人話事。
我都係咁諗。
去健康院同姑娘講發現小朋友吾肯講野。無眼神接觸。想排期驗下係咪有問題先。男仔講野會慢d. 早d比佢返學接觸多d同學仔講野都快d呀
同意。
樓主小朋友唔係啞，就咁睇佢似係自閉傾向、亞士保加症，你留意佢同人有冇眼神接觸，同你溝通時肯唔肯望住你雙眼？同埋哩種小朋友會好堅持做某D「儀式」，例如我小朋友細個時，每日返屋企前，一定要入去樓下超市某一個貨架摸一下先肯返上樓，如果唔俾佢入去，佢可以癲到大喊大叫唔停，直至攰到頂唔順瞓著咗！我嗰個只係踩界有自閉傾向啫，但當時心理醫生話缺乏眼神接觸及行「儀式」係哩D小朋友之中好常見。另外，樓主唔好淨係留意小朋友學講嘢，自閉小朋友肢體協調發展都係比較差，差唔多兩歲先識拍手真係有D遲，樓主最好回想返小朋友學爬學行過程係咪都慢，如果佢都有哩個問題，建議你要盡快去搵專家尋求協助。
過來人經驗，我建議樓主帶小朋友去見專家時，一定要帶埋爸爸及長老一齊去，專家當口當面講，好過你自己同佢哋解釋，由其係老人家又有湊仔經驗，已有一套既定概念，你係後輩同佢坳唔入。
1個讚
到呢個年紀，要迫架啦。例如唔講「俾」字，就唔俾玩具/零食佢，就算佢又喊又嘔半小時，都唔可以俾佢。堅持就有成果。
只要講左第一個字，就會易好多。
一般母嬰健康院，明明遲緩左成兩年，都會傾向講「無事既，每個人成長速度唔同，唔好太緊張」。但私人既，就遲3個月都會話小朋友有事。
所以無論查到結果係咩，評估結果唔重要，重要係個訓練。無論小朋友有無SEN，都送佢去訓練，有事要做，無事既小朋友做訓練都係有益。
唔好信d人安慰你話「無事既，我小朋友都係咁，大過就講到啦」。人都傾向唔敢講衰野，安慰又唔洗錢，佢地隨口講就會害左你。到發現有事時，已經錯過黃金6年時間。
我既情況，唔理其他人安慰，堅持話小朋友有事做訓練，做左十年做到無左病徵
3個讚
排緊期做評估了。
我果個好中意轉枕頭果個繩，
玩唔厭。
有時候會係到玩眼快速咁轉，阻止唔到。
佢爸爸就會打佢。
有時見到都好無奈。