好多人以為 YouTuber 或者 KOL 搵好多錢。 （內容比較長，因為我鍾意寫字）
不如等我呢半個行內人分享一下我嘅認知。
首先講明，
我哋因為武漢肺炎多咗好多時間，都開始做片。但我哋從來冇收廣告，FB 影片亦都冇廣告費。我哋收入來源都為我哋間沖繩潛水店。雖然我哋嗰個YouTube channel 已經有廣告, 但係呢啲廣告錢唔係我哋袋, 遲啲先至講點用.
先講 YouTube, 我哋第一條片係大約兩年前, 依家有八萬幾個 view, 但係都係近幾個月先至開YouTube 廣告（因為之前一直未qualify min requirement)。10月開始每個禮拜出大約一兩條片，大部份都開咗YouTube 廣告, 每條片每個星期大約有600-700view, 好嗰啲會有幾千。。暫時加埋大約總共有 ¥15000 收入～如果靠呢啲錢搵食，真係好大鑊。大部份YouTuber 投資期都係以年做單位，仲要出片出得好勤力先至有回報。中途器材，時間，攞料，搵人幫手（路人甲都要），道具, YT 上邊幫自己嘅片賣廣告 (如果唔做，投資時間更加長）全部都要錢。但係最無奈嘅，大部份都係失敗告終。所以我哋有時間先至會做片。
FB 我哋做咗幾年, 主要寫字 （因為我鍾意寫字），都係近半年先至開始每個禮拜出咗兩條片。FB 嘅view 系 YouTube 100倍左右 (係100.) 但係完全冇View收入! 所以呢啲係虛火。FB 廣告門檻非常之高, 近排有啲片有100萬，但係仍然唔qualify 放廣告。
所以FB 上邊會多啲人做植入式廣告。一個幾萬Fans 煮飯blogger 一條片可以收 2-3萬，但係通常中間都會有agent 幫手籌備, 接工作。實際收幾多就唔知道。如果肯收廣告，呢啲就真係錢。只可惜，唔係成日有job。（sorry, 我哋冇… 人搵～hahahah)
仲有第二啲辦法搵$，例如宣傳自己嘅產品，例如叫人買樓，叫人移民。(我哋就係宣傳潛水店同埋沖繩, 雖然我老婆話Oki-Family 做緊蝕本生意…)
重有一啲另類，就係做顧問。我哋就係屬於呢一啲（仲有一兩個比較出名嘅香港日本blogger 都係呢一種, 費事開名, 唔知佢哋想唔想講)，會幫外國政府觀光局同埋商業了解香港市場。但係呢啲收入呢就唔穩定，同埋佢哋通常出手好低… 因為上邊仲有大中小小判。
咁點解我哋蝕本仍然繼續做, 仲要做咁多年。其中一個原因 貪過癮, 喺螢光幕後邊互動其實幾好玩（如果唔係我都唔會喺度吹水…) 。有陣時心情唔好媽媽叉叉，大家一齊圍爐，多啲人一齊分擔。
如果有一日我哋頂唔順，可能會加廣告（其實一路有日本樓同埋移民經紀搵我哋，我同我老婆都唔鍾意做尼啲廣告）。所以希望快啲開閘，咁就可以繼續50年不變！
所以, YouTuber/KOL 其實唔係你地想像中咁容易搵錢。出名嗰啲其實已經投資左唔少，同你地知道嘅時候已經係收成期。更加多，中途已經死咗。