bb 三個月大，覺得同bb熟落左，比頭兩個月容易掌握佢既喜怒哀樂。一開始因為想餵人奶但自己又好少奶而唔開心，喊過好多次，而且生完情緒起伏大，又喊過好多次。
而家回望過去呢兩個月，一出世幾日bb要照燈、自己少人奶到開始接受然後努力泵奶再不停試食/飲上奶野，連一向唔食榴連既我都為左上奶而食榴連，雖然嘗試好多後奶量都無多
而家仲要黎埋m⋯ 但未想放棄，繼續心情放鬆地努力緊想增奶
仲有bb飲夜奶、夜晚一訓落床就喊要抱住訓，仲有時夜晚無啦啦喊成三個鐘停唔到，喊完又無事繼續食奶訓覺，佢就好似無事咁，但對爸媽黎講真係心累了
總之呢兩個月，真係唔知自己同bb爸爸係點樣捱過當然，其他家庭成員支援都好重要既！有人曾經講過，bb越大，日子就會越黎越好，我都好明白呢句說話，尤其兩個半月果時，bb自己戒左夜奶同埋唔使抱住訓，更加感受到呢句說話，哈哈！我都想幫其他湊初生bb媽媽打氣，日子真係會越黎越好架！加油呀！
之不過當好似捱過咁多事之後，但bb對住我好少笑又好少有反應⋯相反，對住其他家庭成員都笑笑口又勁多表情既時候，心裡面都會呷醋，點解bb唔識對我笑呢⋯係咪bb唔鐘意媽媽呢定係自己唔識同bb玩/傾計呢⋯到底bb認唔認得媽媽架呢 etc 有時仲會灰灰地諗，呀媽我無咩事都係出返去餵奶泵奶換片算,其他事都好似唔關我事咁
生左小朋友之後，同老公好似focus 點樣去處理湊bb，變相好似少左傾計時間同機會，加上對於bb爸爸既唔主動，有時會覺得激心同嬲，叫佢做野既時候會應左會做，但最後都係慣性地唔記得
