BB就出世, 我想做全母乳媽媽, 唔知有咩要留意既呢?
見有D朋友原本想做全母乳媽媽,最後都唔成功, 唔知有無過來人有經驗分享?
1個讚
唔成功係因為自己放棄，可以有好多藉口（除非係身體有事）
餵母乳最緊要係埋身，同埋唔好補奶粉
母乳會根據bb需要自己調節份量，補咗奶粉會令身體以為唔需要咁多奶
PS全母乳媽媽，小朋友18M自然離乳
4個讚
唔係想打擊你，但最好唔好迫自己一定要全母乳，唔好比自己太大壓力，因為壓力好影響奶量。
特別係頭一星期，媽媽可能未上奶，暫時補奶粉比BB係好正常的。
利申：頭一星期補奶粉，產假時全母乳，返工後半人奶半奶粉，餵咗10個月。
1個讚
埋身最緊要
總之bb一餓就埋身，初頭未上奶 可能會食得超密，餵完半粒鐘佢又餓咁，總之瘋狂埋身就啱架喇
留意bb大小便，夠濕片就唔使擔心佢唔飽…
最開頭可能要教吓bb正確嘅咀型吸啜，健康院d書仔都有教點為之啱，佢含得唔好就搵手指幫吓佢 擘開佢咀唇 含到啱為止 如果bb真係唔識啜or唔夠力啜 就要密密泵~
要飲超超超多水，一有時間瞓就瞓吓~ 休息夠 上奶會好d…同埋身邊人嘅支持都好重要! 老一輩未必個個支持餵人奶，加上老公見你辛苦或見bb成日唔飽咁 都可能會係咁叫你補奶粉…我就試過為咗補唔補粉 而同老公嗌哂交
你要預早同佢地打定底~
不過講到尾，我覺得都唔使比太大壓力自己嘅，盡咗力就ok!! 生完頭一個月 情緒真係唔知點解會有d失控…尤其一到半夜 個人成日好灰咁
我同幾個frds都表示 試過好多次半夜喊住餵奶 而家諗返都唔知點解會咁…總之盡力就得啦! 初頭補吓粉都冇乜大不了! 加油~~~
3個讚
密密埋身，可以唔補粉就唔補，但要補又唔洗內疚。只要bb體重健康院合格就收貨，唔洗刻意追磅。放鬆心情，教導定老公長老bb “夠食”定義
p.s. 大仔全人奶到2歲8個月。細佬就快3個半月全人奶中 
2個讚
真係要平常心， 生完飲炒米茶， 飲多啲湯水， 都可以幫助上奶
順其自然啦，有得餵就繼續餵，無既話吃奶粉都冇問題。
但要堅持囉，因為要全職餵都唔容易，要隨傳隨到，出街去邊都要搵地方餵。。。雖然而家疫情街都冇得去。。有時谷胸又好難受，半夜BB繼續瞓，我就要局住plumb 奶。個胸好似唔係自己既。
利申:全職餵左10個月，打算餵到12個月就斷。
還我個胸部自主權呀~
放鬆心情，唔好逼自己，掛住隻b喺心口俾佢隨時啜。飲多啲湯、炒米茶，坐完月就飲多啲水。
我當時有補粉，補粉補到心灰意冷，但仍然都堅持，之後，BB大概3個月時就走上全母乳之路（泵媽），但到15個月時，因為身體問題餵唔到母乳。
要做到全母乳個心態真係好緊要，堅持得黎又唔好比咁大壓力自己。唔好靠補粉得黎，又唔好將奶粉惡魔化。
盡力而為吧，餵奶粉又好餵母乳都好，大家都係好媽媽。
1個讚
有毅力, 飲勁多水. 你預咗BB成日肚餓,每次最多瞓兩三個鐘就要餵奶. 開頭嘅時候非常驚BB食飽。要多留意佢嘅尿片。有出就即刻有入。
屋企人一定要體諒，你唔夠瞓心情一定會差。我個女一直都係全人奶，三歲幾自然離乳。
飲食方面我老婆冇特別食乜嘢來增加奶，最緊要飲多啲水。
當你諗到全人奶，小朋友會幫你吸晒你啲脂肪，個一排你點蝕都唔會肥。你就會有動力繼續落去。
最緊要有毅力。呢個時代，全人奶唔係容易嘅事。加油！習慣咗開頭果幾個月，就唔好再覺得辛苦。佢唔再食嘅時候你就會好失落。
最重要多D 湯水、食多啲飯，唔怕辛苦、密密埋身餵甚至邊餵邊pump 去儲奶，一有機會就瞓覺。
- 我女食到3 歲半自然離乳
1個讚
加油～首先第一樣野就係呀b啜得愈多你會愈多奶
如果佢食唔晒嘅話 你就用個泵泵清佢 令到個胸知道要做奶
另外一開始會塞奶，可以食卵磷脂同埋不停推佢按摩推鬆佢，搞唔掂可以搵催乳師，千祈唔好搞到發燒乳腺炎，到時你要食藥開刀吸癑有幾多奶都無用…
仲有要食多啲野，飲多啲炒米茶，乳腺未通之前唔好飲野上奶（如果唔係塞到你傻）
最後，唔好俾咁大壓力自己，有啲人係做哂所有野都唔夠奶，有啲人係乜都唔做就夠哂～ 就算食下一餐半餐奶粉，並唔係咩壞事
加油 有咩唔明上黎問～
2個讚
呢句講得好岩呀，講真你又唔夠訓又要好好休養，你老公好有可能會因為唔想你咁攰直接俾奶粉呀b，你要一早同佢溝通好
一陣兩個都唔夠訓，嘈交就唔好喇
全母乳?我覺得最重要你BB出世個日同之後個幾日, 搵個好既陪月真係識得教你點母乳餵哺, 令你盡快上手, 而且埋身多D係好有幫助
其實好多因素影響，我好彩係比較多奶嘅媽媽，同體質可能都有d關係同埋個陪月成日幫我按摩，但係行全人奶係唔易，所以大家都話平常心，多埋身多休息同飲水係岩。人奶定奶粉大家嘅目的都係想BB食飽，健康成長，所以真係隨緣。
個時我係醫院第一晚BB唔係身邊，一得閒就按胸，BB埋唔到身我都2個鐘自己支下D奶，半夜都係咁支，BB食唔到都攬下佢比佢啜下，保持自己休息足就會慢慢生產到奶。
唔知你打算公立定私院生呢?
私院好多時BB一出世,BB同媽媽就分開, 雖然媽媽可以休息, 但就限時限刻先可以見BB/埋身餵BB, 少左埋身, 自然母乳唔夠
公立就可以比媽媽一直同BB一齊, 但媽媽有機會會休息唔夠, 不過可以埋多D身, 咁就可以多D母乳, 到出院搵到人教你點餵, 又或者遇到問題點處理, 咁就事半功倍
我個仔之前係港怡出世, 佢地有專人可以教點樣餵哺母乳, 而且BB仲可以全日都係我房. 我見佢地既顧問都有國際認證哺乳既認証
真係唔該你, 咁聽落最開頭既時間真係好重要
“最開頭可能要教吓bb正確嘅咀型吸啜”, 其實萬一自己姿勢唔好, 醫院/護士會唔會幫到手?
定係最開頭已經要搵定陪月到醫院?
聽落好似幾pro，新手咩都唔識有人教會好好多，唔洗自己攪到一獲粥。
我喺pmh生嘅，當時d姑娘同姐姐都好好人 好肯教，我都有係咁捉住佢哋嚟問，多d比佢哋睇住我餵 比佢哋執我d姿勢…不妨問多幾個唔同嘅姑娘、姐姐，因為個個人教都可能有d唔同嘅散手教到你~ 如果你喺私家生就應該更多support (聽d frds講咋)…政府醫院就睇你彩數啦 有時佢哋真係忙 都冇辦法…