其實band 幾唔係重點
重點係裏面d 學生係點樣
Band 1 學生係比較勤力，認真，好學
(整體上的確係咁樣)
因為受學校的學習氣氛的影響
但唔等於band1學生將來一定更有前途
只不過作為家長，
我緊係想自己個女身邊d 同學都乖巧又認真啦
中學生好易受朋友影響
如果身邊d 人都比較hea + 懶散
咁佢都好容易變hea+求其
(band 2 3 學校都唔少叻人，
但點解叻得來又入唔到band 1,
好多時係冇家長跟功課同温習，
加上本身唔太喜歡讀書，
於是變成 “叻，但係成績差”)
所以band 幾係唔保證你更有前途或者揾得錢多，
但起碼你知道孩子身邊的朋友都不會太差
其實學習氣氛先係最重要
當一班朋友會讀書，自然就會形成氛圍，令你唔會太鬆懈
Band1可以有一班唔讀書既朋友，一齊hea
同樣地，band2，3都可以有一班讀書既朋友
但band1讀書風氣好，機率上，比band2大，band2又比band3大
當然，都要睇下學生係咩性格，如果唔太受人影響，就另計
但青春期，受人影響會大好多
成日見一班hea住讀書，日日抄功課，甚至功課都唔交
考試又鍾意比低分（唔係比高分）
當人人都咁做時，你自然唔會覺得有問題
呢個就係讀書風氣差衍生出黎既惡果
好同意
band 1 唔係d咩禁神級
只係band 1 讀書風氣比較好，雖然都會有壞學生，但相對少好多。
如果行入班房個個玩到癲晒，你再乖都嘈到學唔到野。
事實亦證明band 3生入大學既人一定有，只相對少，比例唔高。
香港社會好現實，雖然行行出狀元，但大學畢業選擇比中學畢業多，出頭機會都自然會多d， 可以按自己喜歡去揀事業。。。讀到中學，能揀既職位都變得窄左。 當然，中學畢業都可以做老闆，但到管理一盤生意時，就會知道自己既不足。
做人父母，從來都唔係擔心自己孩子長大後做唔做到富豪。但起碼都要確保父母老到再賺唔到錢養家時，孩子可以自己養活自己，可以過d有質素既生活，起碼有屋住有飯食有閒錢銷費下啦
事實響香港，讀書唔成，將來出到社會機會一定比人少，他朝有日到自己成為父母，就會明白。
學習氣氛、朋輩影響、教學質素、甚至校園環境、network , 課外活動種類等都係家長係選校時所考慮的、而不是純因為Band 1 或想要名校光環而揀。
有d band1師資都麻麻地，所以更加要小心選擇學校
band 1最大好處係啲同學正常啲, 你有得專心讀書
band 3每班只要有一個搞吓事, 有啲discipline問題, 成班都會受影響
band 1的確唔係識飛, 但你冇讀過band 3唔知有幾煩
其實讀咩banding 隨緣，我兩個仔都入不同banding, 但係適合佢地，我覺得ok,不會迫另一個去高啲banding. 千萬唔好拔苗助長。
見過幾個人，細個時父母狂谷，谷到入band1
反而令佢地討厭左讀書，升中後，一直在下游徘徊
但我覺得，最怕係因為死谷而令父母仔女關係變差，一旦變差，好多野都挽救唔到
有啲父母係情願個仔係b1考第尾都要入。
所以話係幾個因素而不只是因為光環。
而我知有一所band 1 老師唔太理學生品德,都有媽媽同我分享過,所以不會揀
要選擇一間適合子女入讀的學校。大仔讀B2A學校，而阿女就讀傳統B1A女校，两校的英文科的教材都相差很大
B1A同B2A中間差左2個Lv喎 
若單說英文科，以我替人補習的經驗，即使B1a學校之間也可以有很大分別！例如有間神校(英文5+達90％以上)，中一嘅教材和程度已相當深，初中課程已滲入英國文學嘅材料去教，而另一間男神B1a 官校，中一嘅英文就好一般，可能係生源嘅關係，始終唔可以深得太誇張。
ME 2,但我地校風係大部分人掛住玩 
,有少部分人讀書叻,但無果D欺淩事件,我地返中學好開心~
我朋友讀band4,5,佢地學校真係有摑臉淋水果d欺淩事件!
我信呀!我朋友當年讀band5中學,佢話好多欺凌事件(佢無事,因佢哥當年都係行古惑) 
唔係自己親眼見，我真係唔知band 3(想當年的band5)係咁恐佈.
當然一定有人話，band 1都有欺淩，精神上的欺淩仲辛苦過肉體上見血…我明，我自己讀band1英中，但如果俾我再揀，我都係讀返band 1…哈哈！想當年我班有一個女同學俾人杯葛，不過可能真係人夾人，佢又唔埋堆，我唔知佢係咪覺得人精祌欺淩佢…但肯定冇人會打佢閙佢…到依家大個左，大家gathering又好似冇晒嘢，冇左以前年輕時個啲小圈子…佢依家做左老師。
我讀以前既band 3-4學校(畢左業之後已band 5)，當然有好同學亦有唔好，但好極都唔係用心讀書，會考都係得十二三分，壞既唔止響學校欺凌同收數，仲有人招惹埋隔離學校d黑社會響學校出面打交。有個大兩屆既師兄誇張到，老師見佢幾日冇返又搵唔到屋企人，後來睇報紙見到個打劫既兇徒個名有d似佢，打電話去警署問先知，原來佢真係打劫比人拉左…
我老公讀band 1學校，當然完全唔會發生咁既事，最多係d人口角下，或者讀書壓力好大。佢D同學會考廿幾三十分，中五已經睇定大學想入乜嘢系，出黎大部份專業人士，根本唔洗擔心會學壞。
Band 1之所以好係因為佢地風氣好，入讀唔需要擔心有好多壞同學帶壞。如果有得揀，我相信作為家長心中有數。唔係話一定要band 1先好，但唔band 1 都搵間風氣好，而風氣好既band 3…我孤陋寡聞，又真係冇乜聽過。
我間band 5學校(我要強調我入讀時係band 3架 
)，精神欺凌太高層次，我眼見都係肉體欺凌。但我間學校既訓導老師又好勁，如果欺凌得過份，佢地會搵蝦人果班既「大佬」講數，通常之後會收斂下。有個老師以前都行過古惑，後來信教迷途知返，聽講佢身上有以前劈友留低既戰績，所以d壞份子都比幾分薄面佢。
我覺得老師好重要，band 5 唔係講求成績，但有heart的老師，真係可以生命影響生命。唔係人人都係讀書材料，成績差冇錯架，至少學好做人。
我有個中學同學一畢業去band 5教，佢本身滿腔熱血架，但身邊的同事，學生，環境令佢越來越頹…可能真係冇乜滿足感，轉左教小學。
BAND 1學生係唔需要聽書, 我記得我地果時42人一班, 41個都出去補ECON (因為老師是廢到喊呃飯食果隻), 會考返黎個個攞A攞B, 大家以為老師功勞, 其實一D都無佢份